Спорт - сывлăх çăл куçĕ. Вăл кăмăл-туйăма çĕклентерет, вăй-хал хушать, пурнăç çине урăхларах пăхма вĕрентет, ăна пулах тус-юлташ та нумайланать. Спорт мероприятийĕсене вара кашни хăйĕн ирĕкĕпе хутшăнать. Акă, иртнĕ эрнере районти тĕп стадионра инвалидсем хушшинче спорт уявĕ иртрĕ. Вĕсем шашкăлла, шахматла выляссипе, дартс енĕпе тупăшрĕç. Уява Чăваш Республикинчи инвалидсен обществин председателĕ М.П.Кузьминых йĕркелесе пынине палăртмалла. Маргарита Павловна инвалидсен пурнăçне кăшт та пулин çăмăллатас, вĕсене тимлĕх уйăрас тесе сахал мар ĕç тăвать: районсем хушшинче савăнăçлă тĕл пулусем йĕркелет, пĕр-пĕринпе курнăçса калаçма майсем туса парать.

Ку хутĕнче районти инвалидсен ушкăнĕ (председателĕ Е.А.Сергеева) Етĕрне тăрăхĕнче пурăнакансемпе (председателĕ Г.М.Перцев) спорт ăмăртăвĕсенче тупăшрĕ. Туслă тĕл пулăва райадминистраци пуçлăхĕн пĕрремĕш çумĕ Т.Н.Шереметьева, социаллă хÿтлĕх пайĕн начальникĕ В.И.Герасимова та хутшăнчĕç, инвалидсене ăмăртусенче ăнăçу сунчĕç.

Спорт ăмăртăвĕсем хыççăн Чутай енĕн паллă юрăçи, “Çын тата çут çанталăк” музейĕн директорĕ З.С.Спиридонова, унăн ывăлĕ Алексей, мăнукĕ Александра инвалидсене хăйсен пултарулăхĕпе савăнтарчĕç. Культура çурчĕн ĕçченĕ, Василий Ефимович, баянпа выляса пулăшса пычĕ.

Ăмăрту çĕнтерÿçисене Хисеп грамотипе асăнмалăх парнесем парса чысларĕç.