Савăнăçлă уяв пулчĕ юн кун Хĕрлĕ Чутай салинчи тĕп стадионра. Унта ял тăрăхĕсенчи спортсменсем, курма килнисем йышлăн пухăнчĕç.

Физкультурник кунне халалланă спорт уявĕ велочупуран пуçланчĕ. Шкул ачисем велосипедсемпе пĕр рете тăрса старта тухрĕç. Ку енĕпе  Максим Кузнецов, Сергей Сарин, Николай Краснов пултарулăхпа палăрчĕç.

100 метрлă дистанцие парăнтарассипе массăллă чупу иртрĕ. Çамрăксенчен финиша чи малтан Андрей Сидоровпа (Мăн Этмен тăрăхĕ) Люда Степанова (Хĕрлĕ Чутай сали) çитрĕç, уяв парнине тивĕçрĕç.

Эстафета тупăшăвĕнче шкул ачисем хушшинче атнарсем çивĕчрех пулчĕç, иккĕмĕш вырăна шулюсем çĕнсе илчĕç, виççĕмĕш - хĕрлĕчутайсем. Аслăраххисем хушшинче çĕнтерÿçĕ ята Мăн Этмен тăрăхĕнчи çамрăксем тивĕçрĕç. Спорт ветеранĕсем хушшинчи тупăшура малтисем тралькассисем пулчĕç.

Волейболла выляма кăмăллакансем хушшинче хĕрÿ кĕрешÿ пычĕ. Хĕрарăмсен ушкăнĕнчен пĕрремĕш вырăна Мăн Этменти хĕрсем çĕнсе илчĕç, иккĕмĕш - хĕрлĕчутайсем. Арçынсен ушкăнĕсем хушшинче хастарлăхпа Хĕрлĕ Чутай салинчи çамрăксен пĕрлештернĕ команди палăрчĕ, иккĕмĕш вырăна Мăн Этмен тăрăхĕнче пурăнакансем тивĕçрĕç.

Канат туртассипе чи вăйлисем мăнэтменсем пулни палăрчĕ, иккĕмĕш - ачкассисем.

Йывăр атлетикăна кăмăллакансем гранат ывăтассипе тупăшрĕç. Арçынсенчен чи ăстарах Туканаш каччи, студент, Николай Ванягин пулчĕ. Вăл 500 грамм йывăрăш таякан граната 49 метра çити ывăтма пултарчĕ.

Хĕрарăмсен ушкăнĕнче  Любовь Шивиркина (редакци ĕçченĕ) маттуртарах пулчĕ.

Çемьесен эстафети те иртрĕ. Унта Дадюковсем, Романовсем, Ефремовсем хутшăнчĕç. Ку енĕпе Дадюковсен çемйине парăнтаракан çук. Хальхинче те çаплах пулчĕ. Вĕсем - çĕнтерÿçĕсем.

Кире пуканĕ йăтакансем те тупăнчĕç. Шкул ачисенчен чи пултарулли Михаил Ефремов (Хĕрлĕ Чутай гимназийĕ) пулнине палăртмалла, аслисенчен - Владимир Герасимов (Питĕркасси).

Мини-футболла выляса «Юг» команда «Север» ушкăнри спортсменсене 5:2 шутпа çĕнтерчĕ.

Спорт уявĕнче «Тайфун» (Уйпуç) команда шалти ĕçсен пайĕн спортсменĕсемпе футболла вылярĕ. Çĕн Ирчемеспе Уйпуç ялĕсенчи çамрăксене ку енĕпе парăнтарсах каяймаççĕ-ха. Вĕсем улттăмĕш çул ĕнтĕ район чемпионĕн ятне çÿлте тытса пыраççĕ. Уяври тĕл пулура та вĕсем  йĕрке хуралĕн ĕçченĕсене 2:1 шутпа парăнтарчĕç.

Тĕп стадионра уяв каçченех тăсăлчĕ. Спорта юратакансем вăй-хала тĕрĕс­лерĕç, сывлăха çирĕплетрĕç.