Хĕрлĕ  Чутай районĕнчи инвалидсем паян хăйсене пĕччен туймаççĕ, общество пурнăçне туллин хутшăнма тăрăшаççĕ. Нумаях пулмасть ял тăрăхĕсем хушшинчи тĕп библиотекăра вĕсен пултарулăх ĕçĕсен куравĕ уçăлнă. Унта 10 ял тăрăхĕнче пурăнакан çынсем хăйсен ĕçĕсене тăратнă.

Район çыннисем куравра пулса курнă май, ентешсем куç умĕнчех тĕлĕнмелле япаласем ăсталама пултарнипе паллашнă. Е.Сергеева чĕнтĕр çыхмалли ăсталăха кăтартнă, Ф.Алексеев вара кăмăл тăвакансене йывăçа касса илемлетме вĕрентнĕ. В.Ермолаев вара - чăн-чăн художник. Вăл мольберт умĕнче ÿкерчĕксем тумалли вăрттăнлăха алла илме пулăшнă. Инвалидсен тепĕр ушкăнĕ пухăннисене пысăках мар концерт кăтартнă. Жюри членĕсем чи лайăх ĕçсене Етĕрнере ирттерекен инвалидсен куравĕ валли суйласа илнĕ.