Çуллахи каникула кашни ача хăйне май ирттерет: пĕри пушă вăхăтпа усă курса ир пуçласа мĕн каçчен “сенкер экран” кăтартакан передачăсене пăхать, тепри шыва кĕрет, юлташĕсемпе вылять. Хĕрлĕ Чутайри Çĕнĕ центрта пурăнакан Сергей Сарин вара каникула усăллă ирттерет: сиплĕ курăксене пуçтарса хăйне валли пĕчĕк шалу тума тăрăшать.

Хальлĕхе тăрăшуллă арçын ача 200 килограмм ытла медицина препарачĕсем хатĕрлемелли чĕр тавара пуçтарнă. Ĕçлеме ÿркенменшĕн алла 500 тенкĕ укçа тытса курнă.

Çу кунĕнче сиплĕ курăк пуçтаракансем татах та пур. Акă, Хĕрлĕ Чутай гимназийĕнче ăс пухакан В.Герасимова кашни кун “Заготпром” предприятине вăтăршар килограмм чĕр тавар пуçтарса парать.

Райпо тытăмĕнчи “Заготпром” предприяти çулсеренех эмел курăкĕсене пуçтаракан ачасене парнепе хавхалантарнине ырăпа асăнмалла. Иртнĕ çул та сиплĕ курăксене чи нумай пуçтарнă вĕренекенсене сотовăй телефонпа наградăланă. Ватăсене те манман. Сăмахран, Утаркасси ялĕнчи И.Иванов пенсионера парнепе хавхалантарнă. Кăçал та курăк пухас ĕçре активлăхпа палăрнисене “Заготпром” предприяти парнесем парас шухăшлă. Çавăнпа та, ачасем, сиплĕ курăксене ытларах пухăр.