Етĕрне районĕнче июнĕн 27-мĕшĕнчен тытăнса июлĕн 2-мĕшĕччен юнармеецсен юхăмĕн “Орленок” вăййисен республикăри финалĕ иртнĕ. Унта Хĕрлĕ Чутай гимназийĕн юнармеецĕсен команди те хастар хутшăнса аван кăтартусемпе палăрнă. Чăваш Республикин районĕсемпе хулисенчен хутшăннă 24 командăран чутайсем пĕтĕмĕшле балсемпе 4-мĕш вырăна тивĕçнĕ. Калас пулать, юнармеецсен теори пайĕ, çарпа спорт блокĕн конкурсĕсемпе соревнованисем тата “Хăрушсăрлăх шкулĕ” блокăн 4 конкурсĕ витĕр тухма тивнĕ.

Хĕрлĕ Чутай гимназийĕн вĕренекенĕсем район ятне чыслăн хÿтĕленĕ. Чăваш Республикин çар комиссариачĕ ирттернĕ “Йăрăс пÿллĕ те яштака - хисепе тивĕç” конкурсра виççĕмĕш вырăн йышăннă. Чăваш Ен Спорт министерстви, Чăваш Республикин Шалти ĕçсен министерстви, ЧР РОСТО Канашĕ тата республикăри çар ĕç комиссариачĕ йĕркеленĕ “Çарпа спортăн  тĕрлĕ енĕпе кĕрешесси” конкурсра Чутай команди иккĕмĕш пулнă. ЧР ШĔМ-ĕн ГИБДД ирттернĕ “Шанчăклă кустăрма конкурсра та гимназире вĕренекенсем иккĕмĕш вырăна тухма пултарнă. “Хÿтĕлев” конкурса ЧР Гражданла оборона тата чрезвычайлă лару-тăру комитечĕ хатĕрленĕ, кунта чутайсем виççĕмĕш вырăн çĕнсе илнĕ. Палăртма кăмăллă, “Йăрăс пÿллĕ те яштака - хисепе тивĕç” конкурс пĕтĕмлетĕвĕсемпе Хĕрлĕ Чутай гимназийĕнче 10 А класра ăс пухнă Павел Григорьева чи лайăх командир тесе палăртнă.