Республика кунне халалласа Шупашкарта, Улатăрта тата Сĕнтĕрвăрринче чылай мероприяти ирттерессе маларах пĕл­тернĕччĕ ĕнтĕ. Палăртмалла, чутайсем те вĕсенче активлă хутшăннă, пултарулăхне кăтартнă.

Акă, июнĕн 23-25-мĕшĕсенче пынă регионсен хушшинчи “Регионсем - чикĕсене пăхăнмасăр килĕштерсе ĕçлесси” куравра хĕрлĕчутайсен ал ĕçĕсем те вырăн тупнă. Тĕслĕхрен, Евдокия Сергееван тата Зоя Перепелкинан, Чутай гимназийĕнчи Ирина Захаровапа Юрий Шереметьев педагогсен, Хусанушкăнь шкулĕнчи Сергей Марков учителĕн тата Тури Çĕрпÿкасси шкулĕнчи Сергей Кудряшов вĕрентекенĕн творчествăлла ĕçĕсем виçĕ кун хушши куракансене савăнтарнă. Çавăн пекех пирĕн район пирки курава пухăннисем стенд урлă чылай пĕлме пултарнă. Калас пулать, унта районта приоритетлă наци проекчĕсене епле пурнăçа кĕртнине, Ăс-хакăл çутлăхĕн çулталăкĕн тĕллевĕсене мĕнле пурнăçланине тата ытти тĕрлĕ информацие çутатнă, сăн ÿкерчĕкĕсем вара вĕсене илемлетнĕ те пуянлатнă. Унсăр пуçне “Янтарь” ТЯО тата “Четайское” УАО предприятин продукцийĕсем те куравра пулнă.

Калас пулать, куракансене ытарайми илемлĕ Чутай тумĕпе Ял тăрăхĕсем хушшинчи культурăпа кану центрĕнче ĕçлекен Г.Катейкина, райадминистрацин экономика, пурлăх тата çĕр хутшăнăвĕсен пайĕнче тимлекен С.Митрасовапа Л.Романова тата Л.Стафик ăшшăн кĕтсе илнĕ. Кунтах район пуçлăхĕ А.И.Криков, унăн çумĕ И.Л.Хораськин, райадминистрацин социаллă аталану пайĕн начальникĕ А.Н.Самсонов, экономика, пурлăх тата çĕр хутшăнăвĕсен пайĕн начальникĕ Л.Н.Сергеева тата ачасемпе çамрăксен пултарулăх Çурчĕн директорĕ В.М.Коракова курава пырса курнине палăртмалла.

Чутай ăстисен ал ĕçĕсем нумайăшне тыткăнланă иккен. Хăшĕ-пĕрин вĕсене туянма та кăмăл пулнă. Хĕрлĕ Чутай районĕ пирки çырнă кĕнекесемпе те чылайăшĕ интересленнĕ. Чутай лимоначĕ, пĕремĕкĕ тата мармелачĕ куракансене астарнă, çисе курма йыхăрнă. Сăмах май, чутайсен куравĕпе паллашма пыракансен шучĕ нумай пулнă. Вĕсем хушшинче ытларах Чутайра çуралса ÿснĕ, халĕ хулара пурăнакансем. Çавăн пекех “Чавал” ентешлĕхĕн членĕ тата секретарĕ В.Савинкин, Йĕпреç район пуçлăхĕ  тата ыттисем  пынă.

х х х

Улатăрпа  Сĕнтĕрвăрри хулисенче уяв сасси июнĕн 23-мĕшĕнчех илтĕнме пуçларĕ тесен те йăнăш пулмĕ. Шăпах çак кун Улатăрта çĕнĕ чукун çул вокзал çурчĕ уçăлнă. Савăнăçлă мероприятие ЧР Президенчĕ Н.Федоров, РФ Сывлăх сыхлавĕн тата социаллă аталану министрĕ М.Зурабов, РФ Президенчĕн Атăлçи федераллă округĕн полномочиллĕ представителĕ А.Коновалов хутшăннă.

Палăртма кăмăллă, пирĕн районти ял тăрăхĕсем хушшинчи культурăпа кану центрĕ çумĕнчи “Шокăль” фольклор ансамблĕ  чукун çул вокзал çуртне савăнăçлă лару-тăрура хута янă çĕрте пулнă, хăнасене хăйсен пултарулăхĕпе, чăвашсен ытарайми çи-пуçĕпе тыткăнланă.

х х х

Июнĕн 23-мĕшĕнче Сĕнтĕрвăрри районĕнче физкультурăпа сывлăха çирĕплетекен “Шурă чулсем” кану центрĕнче пысăк спорт уявĕ иртнĕ. Олимпиада икĕ куна тăсăлнă. Унта хутшăнакансем спортăн тĕрлĕ енĕпе кĕрешсе ырă ята çĕнсе илнĕ, пысăк наградăсене тивĕçнĕ. Пысăк пĕлтерĕшлĕ спорт уявне районти чи пултаруллă 14 спортсмен хутшăннă. Командăна Вячеслав Дадюков (спорт шкулĕн тренерĕ) ертсе пынă. Вĕсем армспорт, волейбол, мини-футбол, триатлон, шашка вăййисене хутшăнса хăйсен вăй-халне тĕрĕсленĕ, пултарулăх кăтартнă. Акă, сĕтел хушшине ларса алă вăйне виçес тупăшура Алевтина Дадюкова хăйĕн виçеллисем хушшинче 2-мĕш вырăна çĕнсе илнĕ. Шашкăлла выляссипе Валерий Храмов хастарлăх кăтартнă, лайăх кăтартупа палăрнă. Триатлонистсем эстафетăра, шывра ишессипе, велочупура тата 500 метрлă дистанцие парăнтарассипе ăмăртнă. Командăна Владимир Индряков, Вячеслав Дадюков, Алексей Мадебейкин хÿтĕленĕ. Вĕсем пур енĕпе те хастар кĕрешсе республикăра 3-мĕш вырăна тивĕçнĕ.