Конкурса сывлăх сыхлавĕн тата социаллă аталану министерствин специалисчĕ Н.В.Ириткова уçрĕ, хăех ертсе пычĕ. Чи малтанах Наталья Владимировна пухăннисене ăшшăн саламларĕ, конкурс тĕллевĕсемпе тата хутшăнакан социаллă ĕçченсемпе паллаштарчĕ. Хăйсен професси ăсталăхне кăтартма Шупашкар районĕнчи А.Николаева, Вăрмарти - А.Иванова, Çĕмĕрлери - И.Петрова, Çĕрпÿри - А.Сергеева, Красноармейскинчи - В.Михайлова, Элĕкри - Э.Борисова, Муркашри - В.Димитриева, Сĕнтĕрвăрринчи - Т.Вотякова, Куславккари - М.Мосолова социаллă ĕçченсем килсе çитнĕ. Пирĕн район чысне вара Уттапăрĕнчи Ваттисен çуртĕнче тăрăшакан Роза Анатольевна Ярасова социаллă ĕçчен хÿтĕлеме кăмăл тунă.

Унтан Н.Ириткова район пуçлăхне А.И.Крикова сăмах пачĕ. Александр Иванович хăнасене Хĕрлĕ Чутай çĕрĕ çинче хапăл туса кĕтнине пĕлтерчĕ, конкурса хутшăнакан социаллă ĕçченсене ăнăçу сунчĕ.

Конкурса хутшăнакансен пултарулăхне хаклакан жюри председателĕ, Сывлăх сыхлавĕн тата социаллă аталану министрĕн çумĕ Г.В.Степанов сăмах илчĕ, социаллă ĕçченсене ыр кăмăллăхĕшĕн, ватăсемшĕн тăрăшнишĕн тав турĕ, вĕсене конкурсра çĕнтерме ăнăçу сунчĕ.

“Эпĕ социаллă ĕçчен, юлташсем” пĕрремĕш конкурсра социаллă ĕçченсем хăйсемпе паллаштарчĕç. Ку конкурсра Р.Ярасова тата ăна пулăшакан ушкăн Ваттисен çурчĕ яланах ватăсене хапăл тунине, социаллă ĕçченсем вĕсен канлĕ ватлăхĕшĕн, пушă вăхăтне интереслĕ йĕркелеме тăрăшнине кăтартса пачĕç. Хăйĕнпе аванах паллаштарчĕ Роза, çавна май 50 балл пухрĕ. Шупашкар районĕнчи социаллă ĕçченĕн вара чи пысăк балл - 54.

Конкурсантсем социаллă пулăшупа тивĕçтерекен мерăсене, тĕрлĕ право докуменчĕсене йĕркелеме пĕлнине иккĕмĕш конкурс кăтартса пачĕ. “Пĕлетĕп, тума пĕлетĕп, вĕренĕп..!” конкурса сăнама вара питĕ интереслĕ пулчĕ. Конкурса хутшăнакансем 20 минут хушшинче хăйсен çемçе те черчен аллисемпе алă ĕç турĕç: пĕри арларĕ, тепри тĕрлĕ аппликацисем хатĕрлерĕ, виççĕмĕшĕ чуста çăрса унтан тĕрлĕ фигурăсем туса кăтартрĕ. Калас пулать, хăш-пĕр социаллă ĕçченĕн ĕçĕ хитре те паха пулчĕ, анчах та хăйсен ăсталăхĕпе тĕплĕн паллаштарайманнипе вĕсен ĕçĕсем пысăк хака тивĕçеймерĕç. Вăрмар хĕр-упраçĕн ĕçĕ вара жюри членĕсен кăмăлне кайрĕ. Вăл чи нумай балл пухса парнене тивĕçрĕ.

Виççĕмĕш конкурс вăраха тăсăлнипе, куракансене кичемлĕх ан пустăр тесе “Чи лайăх юланутçă” вăйă ирттерчĕç. Унта хутшăнакансен кĕлеткен чи çемçе “вырăнĕпе” урайĕнче сапаланса выртакан шарсене çурмалла пулчĕ. Сĕн­тĕрвăрри районĕнчи хĕр-пике ку вăйăра çĕнтерчĕ, теттене тивĕçрĕ.

Ăс-хакăл çутлăхĕн çулталăкне халалланă “Тутлă историсем” конкурсра социаллă ĕçченсем хăйсен кулинари ăсталăхĕпе паллаштарчĕç. Хĕрлĕчутайсене кунта çитекенни никам та пулмарĕ! Р.Ярасова тĕтĕмленĕ чăх, хитре торт тата кукăль сĕнчĕ. Жюри членĕсем Роза Анатольевна ку конкурсра çĕнтерÿçĕ пулнине палăртрĕç, ăна парне парса хавхалантарчĕç.

Юлашки конкурс “Чап патне картлашка” ятлă пулчĕ. Конкурса хутшăнакансен хăйсен талантне, художество пултарулăхне кăтартмаллаччĕ. Республика кунне халалланă конкурсра Шупашкар районĕнчи социаллă ĕçчен чи нумай балл пухрĕ.

Калас пулать, жюри членĕсем кашни конкурс хыççăн пĕтĕмлетÿ хатĕрленĕ вăхăтра юрă тăхтавĕсем чылай пулчĕç. А.Самсонов, З.Спиридонова, “Хастар” ушкăн пухăннисене юрăсем шăрантарса савăнтарчĕç. А.Башкиров культура ĕçченĕн шÿчĕ те куракансен кăмăлне кайрĕ. Сăмах май, “Хастар” ушкăн хĕр-упраçĕсене - Г.Катейкинапа Н.Петрована - парне пачĕç.

Çапла майпа, жюри пĕтĕмлетĕвĕсем тăрăх, чи нумай балл пухса Çĕрпÿ районĕнчи А.Сергеева социаллă ĕçчен пĕрремĕш вырăна тухрĕ, Шупашкар тăрăхĕнчи А.Николаева - иккĕмĕш, Çĕмĕрле районĕнчи И.Петрова - виççĕмĕш. Çĕнтерÿçĕсене сывлăх сыхлавĕн тата социаллă аталану министерствин Дипломĕпе район пуçлăхĕ А.И.Криков, сывлăх сыхлавĕн тата социаллă аталану министерствин ветерансемпе ĕçлекен пай начальникĕ Г.С.Рязанова наградăларĕç. Конкурса хутшăннă ытти социаллă ĕçченсене Тав çырăвĕ пачĕç. Çавăн пекех конкурса хутшăннисенчен чи çамрăккине - Вăрмар районĕнчи А.Иванована - парнепе хавхалантарчĕç.

Палăртма кăмăллă, район пуçлăхĕ А.И.Криков райадминистраци ячĕпе конкурсра активлăх кăтартнăшăн Р.Ярасована чейник парнелерĕ. Райадминистрацин профсоюз комитечĕн председателĕ Л.В.Тинехпейкина та Роза Анатольевнана парнепе савăнтарчĕ.

Калас пулать, “Професси енĕпе чи лайăххи” республикăри VIII конкурса районта ирттерме социаллă хÿтлĕх пайĕ тата социаллă ыйтусемпе тивĕçтерекен центр хăйсем çине яваплăх илнĕ. Жюри председателĕн çумĕ Г.С.Рязанова çакăншăн В.И.Герасимовапа Г.С.Печникована тав турĕ, вĕсене ĕçре ăнăçу сунчĕ, парне пачĕ.

Юлашкинчен конкурса район пуçлăхĕ А.И.Криков пĕтĕмлетсе çапла каларĕ:

- Эпир социаллă ĕçченсем хушшинче иртекен “Професси енĕпе чи лайăххи” республикăри VIII конкурса Хĕрлĕ Чутай районĕнче ирттернишĕн хавас. Конкурс лайăх иртрĕ. Жюри членĕсене пысăк тавтапуç.