Çамрăк “гаишниксем”  смотр-конкурса хатĕрри çинчен рапорт панă хыççăн тĕрлĕ номинацисенче ăмăртма пурте кабинетсем тăрăх вырнаçрĕç. Кунта шкулсенчен килнĕ кашни командăри çамрăк инспекторăн çул-йĕр правилисене пĕлнисĕр пуçне еплерех васкавлă пулăшу памаллине те, страхланни çын пурнăçĕнче мĕн тума кирлине те кăтартса памалла пулчĕ. Унсăр пуçне ачасем велосипедпа тĕрлĕ чăрмавсем витĕр тухса хăйсен ăсталăхĕпе пултарулăхне кăтартса пачĕç. Ку конкурсра велосипед механизмне лайăхрах пĕлессипе тата ăна хăвăрт йĕркелесе ярассипе Çĕн Атикассинчи шкулта вĕренекен Алексей Антонова çитекенни пулмарĕ. Хĕр ачасенчен пултарулăхпа Хĕрлĕ Чутай гимназийĕнчи Ксения Сатлайкина палăрчĕ. Теори тĕлĕшĕнчен çул-йĕр правилисене çирĕп пĕлессипе Питĕркассинчи вăтам  шкулта вĕренекен Денис Егоров пуринчен те пултаруллăрах пулчĕ, хĕр ачасенчен - Роза Давыдова (Çĕн Атикасси). Пĕрремĕш медицина пулăшăвĕ парас енĕпе Хĕрлĕ Чутай гимназийĕн вĕренекенĕсем çаврăнăçуллăрах пулчĕç. Анчах уйрăммăн илсен, медицинăна Питĕркассинчи Елена Артемьева тарăнрах пĕлни палăрчĕ. “Эрудитсенчен” чи ăслăраххи Мишеркасси шкулĕнчи Татьяна Храмова тесе палăртрĕç. Çамрăк корреспондентсен тупăшăвĕнче чи ăслăрах, илемлĕ те кăсăклă сочинени çырассипе Ксения Сатлайкина (Хĕрлĕ Чутай гимназийĕ), Валентина Шевченко (Атнар), Кристина Кудряшова (Шулю), Илья Федоров (Питĕркасси) маттуртарах пулчĕç. Инкек-синкекрен страхлас енĕпе иртнĕ конкурсра тĕрĕс хуравсем парса  Пантьăк шкулĕнче вĕренекен Валерий Филиппов малти вырăна йышăнчĕ.

ГИБДД-ăн çамрăк тусĕсем ăмăртăва хутшăнма çул-йĕр хăрушсăрлăх правилисемпе тĕрлĕ плакатсем хатĕрленĕ, агитбригада членĕсем ку енĕпе художествăлла номерсем кăтартрĕç. Ку конкурсра жюри членĕсем çамрăк “гаишниксем” мĕнле çи-пуçпа килнине те шута илчĕç. Çапла вара, ку тупăшура питĕркассисене çитекенни пулмарĕ.

Пĕтĕм конкурссен пĕтĕмлетĕвĕ тăрăх, пĕр­ремĕш вырăна тивĕçлипех Питĕркассинчи вăтам шкулта вĕренекенсем çĕнсе илчĕç. Вĕсем çак ăмăртăва тĕплĕн хатĕрленни кашни конкурсрах палăрса пычĕ. Иккĕмĕш вырăна Хĕрлĕ Чутай гимназийĕн команди тивĕçрĕ, виççĕмĕшне Атнарти вăтам шкулта вĕренекенсем йышăнчĕç. Слета хутшăннă кашни командăна районти ГИБДД уйрăмĕн начальникĕ Ю.Ербулаткин малашне ăнăçусем сунса Хисеп грамотипе парнесем парса савăнтарчĕ. Çавăн пекех вĕрентÿ пайĕ, РОСТО енчен те хавхалантару пулчĕ.

Çĕнтерÿçĕ-команда район чысне хÿтĕлеме республика шайĕнче иртекен ăмăртăва хутшăнĕ.

Слета хутшăнман шкул командисене те асăнса хăвармалла. Вĕсем: Серенкасси, Тури Çĕрпÿкасси, I Хурашаш, Хусанушкăнь. Çакă шкул ĕçне лайăх енчен сăнламасть.