“Çемьере хăтлăх пулсан, çĕршывра та йĕрке”, - теççĕ. Чăн та, пĕтĕмпех тенĕ пек çемьерен пуçланать. Ача çемьере епле воспитани илнишĕн, ĕçе мĕнле хăнăхса пынишĕн, тăванлăх, туслăх тата ытти туйăмсене упрама пĕлнишĕн, ваттисене хисеплеме пултарнишĕн... - пуриншĕн те темелле чи малтанах ашшĕ-амăшĕ яваплă. Пирĕн хушăра хăйсен тĕпренчĕкĕсене çĕршыва юрăхлă, тĕрĕс-тĕкел, ăслă-тăнлă ÿстерме тăрăшакан çемьесем сахал мар. Çакăн пек хисеплĕ çемьесенчен ĕнтĕ асăннă конкурсра Питĕркассинчи Вазинсем, Пĕчĕк Этменти Михеевсем тата Хĕрлĕ Чутайри Чишкинсем хутшăнма кăмăл тунă. Ытти ял тăрăхĕсенче те пултаруллă мăшăрсем пурах. Анчах темшĕн  ытти ял тăрăхĕсен пуçлăхĕсем пуçарулăх кăтартман. Татах та ытларах çемье хутшăннă пулсан, паллах, аванччĕ.

Конкурса райадминистрацин социаллă аталану пайĕн специалисчĕ А.Н. Михуткина ертсе пынине палăртмалла. Чи малтанах, мероприятие уçнă май, вăл залра пухăннисене пурне те Çемье кунĕпе ăшшăн саламларĕ, ырлăх-сывлăх, телей, килĕшÿ сунчĕ. Малалла Алина Николаевна тĕрлĕ конкурссемпе тĕрĕслев витĕр тухакан çемьесемпе паллаштарчĕ. Жюри членĕсене те асăнмасăр иртме çук, вĕсем-çке пултарулăх тĕлĕшĕнчен хак параççĕ. Акă, вĕсем: район пуçлăхĕн пĕрремĕш çумĕ Т.Н.Шереметьева (жюри председателĕ), райадминистрацин йĕркелÿпе тĕрĕслев пайĕн начальникĕ А.П.Кузьмин, ЗАГС пайĕн заведующийĕ Е. С.Барышникова, информаци пайĕн начальникĕ С.П.Князькова, социаллă хÿтлĕх пайĕн начальникĕ В.И.Герасимова тата социаллă ыйтусемпе тивĕçтерекен центрăн директорĕ Г.С.Печникова.

“Паллашăр, ку пирĕн çемье” конкурсра чи малтанах Вазинсем сăмах илчĕç, хăйсемпе туллин паллаштарчĕç. Çемье пуçĕ, Николай Петрович, кил-хуçалăхра тăрăшать, çулталăк çурăри кĕçĕн ывăлне пăхать. Марина Юрьевна Питĕркассинчи вăтам шкулта директорăн вĕрентÿпе воспитани енĕпе ĕçлекен çумĕ, математикăпа информатика учителĕ пулса тимлет. Вĕсен аслă ывăлĕ Юрик 4-мĕш класра ăс пухать.

Владимир Александрович Михеев вара Мăн Этменти вăтам шкулта физкультура учителĕнче тăрăшать. Мария Дмитриевна - вырăнти Культура çурчĕн директорĕ. Вĕсем пĕр ывăлпа икĕ хĕр ÿстерсе пурнăç çулĕ çине кăларнă. Михеевсем 31 çул ĕнтĕ юнашар. Кĕрÿпе кин туянма та ĕлкĕрнĕ вĕсем, мăнук пурри те савăнăç кÿрет.

Чишкинсене те палламан-пĕлмен çын çук та пулĕ. Виталий Кузьмич Ял хуçалăх çыравне ирттерес енĕпе ĕçлекен экономист пулса ĕçлет. Наталья Викторовна - Чăвашстатăн районти тĕп специалисчĕ. Вĕсен илемлĕ те пултаруллă икĕ хĕр ÿсет. Чишкинсем 16 çул пĕрле алла-аллăн утаççĕ.

Çемьесем ыйтусем çине епле хуравлама пĕлнине, интереслĕрех те анлă ыйту пама пултарнине “Ыйту-хурав” конкурс тĕрĕслерĕ. Пурте кăмăллă хуравсемпе ыйтусем хатĕрлесе асра юлчĕç.

“Асамлă апат каçĕ” чăннипех те интереслĕ иртрĕ. Вазинсем чăвашсен шăртанне тата симпыл илсе килнĕ. Михеевсем  типĕ тытнă тапхăрта çимелли апат хатĕрленĕ. Чишкинсем вара “Каприз” салатпа пылак торт тата шампански сĕнчĕç. Блюдăсене илемлетес тĕлĕшпе те творчествăлла пултарулăх пысăк пулни палăрчĕ.

Юлашки конкурс “Юрату юрлаттарать” ятлă пулчĕ. Вазинсем “Çуркунне тĕл пултăм эп сана” юрра кăмăллăн шăрантарчĕç. Михеевсем фольклор ушкăнĕпе юрă-ташă парнелерĕç. Чишкинсем те çемйипех юрлама ăста пулнине палăртса пачĕç.

Калас пулать, жюри членĕсем кашни конкурс хыççăн пĕтĕмлетÿ хатĕрленĕ вăхăтра юрă тăхтавĕсем чылай пулчĕç. А.Самсонов, З.Спиридонова, “Хастар” ушкăн (Г.Катейкина, Н.Петрова) пĕрре мар çепĕç юрă парнелерĕç.

Çапла вара, жюри  пĕтĕмлетĕвĕсем тăрăх, 149 балл пухса Чишкинсем “Çулталăк çемйи” конкурсăн çĕнтерÿçисем пулса тăчĕç. Михеевсем тивĕçлипех иккĕмĕш вырăна тухрĕç. Вазинсем - виççĕмĕш. Çемьесем район пуçлăхĕн Дипломне тата парнесене тивĕçрĕç.

Асăнмалла, райадминистрацин социаллă аталану, социаллă хÿтлĕх пайĕ тата социаллă ыйтусемпе тивĕçтерекен центр хатĕрленĕ конкурса ирттерме Р.Мидейкин, Ю.Аливанкин, Г.Башкирова, Р.Кальматкина, В.Вазина, В.Фролов тата А.Манин предпринимательсем спонсорла пулăшу панă.