Пĕтĕм Раççейри ял хуçалăх çыравĕччен пĕр уйăх ытла кăна юлчĕ ĕнтĕ, çавăнпа та хĕрÿ хатĕрленÿ тапхăрĕ пырать. Пысăк пĕлтерĕшлĕ мероприятиччен ыйту та чылай.

Кĕçнерни кун райадминистрацин Пĕчĕк залĕнче Пĕтĕм Раççейри ял хуçалăх çыравне ирттерес енĕпе йĕркеленĕ районти çырав комиссийĕн ларăвĕ иртрĕ. Кунта комисси членĕсемпе пĕрле ял тăрăхĕсен пуçлăхĕсем те хутшăннине палăртмалла. Малтанах район пуçлăхĕ А.И.Криков ларăва уçрĕ, пухăннисене Чăвашстатăн ертÿçипе Ю.К.Марковпа паллаштарчĕ, кун йĕркинче пăхса тухмалли ыйтусене палăртрĕ.

Районта çак çырава хатĕрленессипе епле ĕçлени çинчен Чăвашстатăн районти тĕп специалисчĕ Н.В.Чишкина каласа пачĕ. Наталья Викторовна Ял хуçалăх çыравне ирттерни çĕршывшăн çав тери пысăк пĕлтерĕшлĕ ĕç пулнине палăртрĕ. Çырава хатĕрленес тĕллевпе халиччен объект списокĕсене тĕрĕсрех палăртас ĕç пынă. Майăн 1-мĕшĕ тĕлне, районĕпе пĕтĕмпе 9873 объект шутланать, вĕсен шутĕнче - 14 пысăк, 7 пĕчĕк ял хуçалăх организацийĕ, 10 хресчен (фермер) хуçалăхĕ тата уйрăм хушма хуçалăх тытакан 9841 çемье. Ял хуçалăх çыравне вăхăтра тата пахалăхлă ирттерес тесе йĕркелÿ планне те çирĕплетнĕ. 66 шутлав, 11 инструктор тата 2 координатор участокĕсен территорийĕсене те палăртнă, çыравçăсене валли пÿлĕм тупас ыйтăва та татнă. Наталья Викторовна пĕлтернĕ тăрăх, 89 çынна (2 координатора, 12 инструктора, 75 çыравçăна) çырав вăхăтĕнче ĕçлеме вĕрентсе хатĕрлемелле. Сăмах май, вĕсен йышĕнче ытларах халăха ĕçпе тивĕçтерекен центрта учетра тăраканнисем, Ял хуçалăх академийĕн студенчĕсем тата иртнĕ халăх перепиçĕнче ĕçлесе курнисем. Çакна та асăнмалла, халăх хушшинче информациллĕ ăнлантару ĕçне ирттерни тĕп вырăн йышăнмалла. Ку енĕпе ял тăрăхĕсен пуçлăхĕсемпе специалисчĕсем те тимлеççĕ.

Ял хуçалăх çыравне ирттерес енĕпе ĕçлекен районти уполномоченнăй Л.В.Тинехпейкина ăнлантару ĕçĕ пирки сăмах хускатрĕ. Акă, халиччен район хаçатĕнче çывхаракан çырав пирки чăвашла тата вырăсла пурĕ 12 статья пичетленĕ, вырăнти радиопа 8 хутчен калаçнă, райадминистраци сайтĕнче 25 материал вырнаçтарнă. Çавăн пекех кăçал Пĕтĕм Раççейри ял хуçалăх çыравĕн темипе ачасен ÿкерчĕкĕсен конкурсне те ирттернĕ, çĕнтерÿçĕсене хавхалантарнă.

Унтан выльăх-чĕрлĕх чирĕсемпе кĕрешекен районти станцин начальникĕ Г.А.Стекольщиков сăмах илчĕ, ял тăрăхĕсен пуçлăхĕсене кайăк грипĕнчен вакцинаци тăвас ĕçре пулăшнăшăн тав турĕ. Çапкаланса çÿрекен хуçасăр йытăсем пирки те калаçу пулса илчĕ.

Чăвашстатăн ертÿçи Ю.К.Марков вара çырав йĕркеллĕ иртессе шаннине пĕлтерчĕ. Çырав документацине 17 тонна янтланă та ĕнтĕ. Июлĕн 1-25-мĕшĕсенче çак мероприяти тапхăрĕнче ĕçлекенсене тÿлес ыйту та татăклă, çыравçăсем вăхăтлăх ĕç пирки килĕшÿ тăвĕç. Çакна та палăртмалла: муниципаллă служащисем çак ĕçе явăçма пултараймаççĕ. Юрий Клементьевич çак мероприяти ниепле те налуксемпе çыхăнман тесе çирĕплетсех каларĕ.

 Питĕркасси тата Пантьăк ял тăрăхĕсен пуçлăхĕсем А.Т.Дмитриевпа Н.И. Трифонов халăха çырава хатĕрлесе çитерес ĕçри йывăрлăхсем çинче чарăнса тăчĕç. Уйрăмах аслă ăру çыннисем çак çыравран шикленеççĕ, вĕсем ку налук хывассипе çыхăннă тесе хăраççĕ. Ял тăрăхĕсен ĕçченĕсем кашни пухурах, мероприятирех ăнлантару ĕçне ирттерме тăрăшаççĕ, ял тăрăхĕн çуртĕнче те пуян информациллĕ стендсем хатĕрленĕ.

Пĕтĕм Раççейри ял хуçалăх çыравĕ аван иртессе шанас килет, ял çыннисен те çак мероприятие пĕр иккĕленÿсĕр хутшăнасчĕ, ку çĕршывшăн усăллă ĕç пулнине ăнланасчĕ.