Акă, Хĕрлĕ Чутайри çăкăр заводнех илер. Çак кунсенче кунта хальхи пурнăç ыйтăвĕсене тивĕçтерекен, пахалăхлăрах çăкăр-булка пĕçерекен çĕнĕ йышши “Ротор-Агро 201Г” кăмака вырнаçтарнă. Сăмах май, кун пек кăмака республикăра пиллĕк кăна. Пирĕн районта та çĕнĕ оборудованисен йышĕ ÿссе пынипе чăннипех мухтанмалла. Мĕншĕн тесен çакă  ĕç пахалăхне ÿстерет, вăхăта перекетлет, ĕç çыннине çăмăллăх кÿрет, экономи тĕлĕ­шĕнчен те чылай лайăх. Акă, тĕслĕхрен, кивĕ кăмака çăкăр-батон таврашĕ пĕçернĕ тапхăрта пĕр сехетре 20 кубла метр газ çунтарнă пулсан, çĕнни вара çак вăхăтрах - çичĕ кубла метр çеç. Тата çакна та палăртмалла, çĕнĕ йышши кăмакапа усă курма пуçланăранпа çăкăр завочĕ туса кăларакан продукцисен пахалăхĕ самаях лайăхланчĕ. Çакăн пирки район çыннисем те мухтанса калаçаççĕ.

Иртнĕ эрне кун вара кунти çĕнĕ йышши оборудованипе тĕплĕнрех паллашма райадминистрацин пĕрремĕш çумĕ Т.Н.Шереметьева кăмăл турĕ. Унăн ĕçне  райпо ертÿçи А.Ю. Степанов, çăкăр завочĕн директорĕ хутшăнчĕç.  В.С.Кузьмин вырăнти лару-тăрупа кĕскен паллаштарчĕ, умри тĕллевсем çинче чарăнса тăчĕ.

Завод туса кăларакан продукцин ассортименчĕ пысăк, пурĕ 70 яхăн издели туса кăлараççĕ кунта: макарон, çăкăр-булка, кондитер цехĕсем ĕçлеççĕ.  Çĕнĕ кăмака вырнаçтарнă май, тата тĕрлĕ йышши çăкăр-батон пĕçерме палăртаççĕ.

Райпо председателĕ А.Ю.Степанов çĕнĕ оборудовани вырнаçтарни çăкăр заводне ÿсĕм çулĕпе илсе пырасси, ял çыннисен ыйтăвĕсене туллин тивĕçтерме пулăшасси пирки каларĕ.