Иртнĕ эрнере Питĕркасси ял тăрăхĕн администрацийĕ, кунти Культура çурчĕн ĕçченĕсем йĕркелесе пынипе шкулта Афган тата Чечен вăрçисенче пуçĕсене хунă Ю.Макаровпа С.Эзенкин паттăр салтаксене асăнса спорт ăмăртăвĕсем иртрĕç. Çак турнира ĕнтĕ 9-мĕш çул йĕркелеççĕ.

Салтак-паттăрсене халалланă спорт уявне торжествăлла майпа Культура çурчĕн директорĕ Н.Быков уçрĕ. ЧР Гимнĕ янрарĕ. Тăван çĕршыва сыхласа пуçĕсене хунă салтаксене асăнса пурте пĕр минут шăп тăчĕç. Ун хыççăн ял тăрăхĕн пуçлăхĕ А.Т.Дмитриев сăмах илчĕ, ку тăрăхра çуралса ÿснĕ, паттăр вилĕмпе вилнĕ çамрăксен ячĕсем ĕмĕр-ĕмĕр халăх асĕнче юлни çинчен каларĕ, яш-кĕрĕмпе хĕр- упраçа яланах спортпа туслă пулма сĕнчĕ. Районти РОСТО Канашĕн председателĕ В.В.Егоров Ю.Макаровпа С.Эзенкинăн ырă ячĕсем ялан чĕрере пулнине палăртрĕ, çамрăксене спорт ăмăртăвĕсенче ăнăçу сунчĕ. Питĕркассинчи вăтам шкул директорĕн çумĕсем М.Ю.Вазинапа А.М.Ейков та сăмах илчĕç, спорт сывлăх çăл куçĕ пулнине палăртрĕç.

Спорт ăмăртăвне шашкăлла выляма юратакансем пуçларĕç. Ăна Хурапыр ялĕн клуб администраторĕ Н.Чубайкин йĕркелесе пычĕ. Шкул ачисем хушшинчи ăмăртура пурне те çĕнтерсе пĕрремĕш вырăна С.Александров çĕнсе илчĕ, аслисенчен пултарулăхпа Кÿпеш ялĕнчи пенсионер Г.Эзенкин палăрчĕ.

Пневматикăлла винтовкăран тĕл перес текенсем йышлă пулчĕç. Чи нумай очко пухса ачасенчен малти вырăна М.Митрофанов йышăнчĕ, арçынсенчен чи пултарулли - В.Герасимов (спорт шкулĕн тренерĕ), хĕрарăмсенчен «Чи лайăх тĕл перекен» ята Л.Гаврилова педагог тивĕçрĕ.

Питĕркассинчи шкулта физкультура учителĕ пулса тимлекен Н.Торейкина волейболла  выляссине йĕркелесе пычĕ. «Çамрăксем» команда «Шкул ачисем» ушкăнпа тĕл пулчĕ, вăйă пĕрремĕшсем çĕнтернипе вĕçленчĕ.

Кунти Культура çурчĕн ĕçченĕ В.Криков турник çинче туртăнакансен тупăшăвне йĕркелерĕ, Г.Вашуркинпа В.Вашуркин турник çинче 15-шер хутчен туртăнса уяв парнине тивĕçрĕç.

Мечĕке ура çинче сиктерессипе хĕрÿ тупăшу пулчĕ. Анчах М.Падюкова çитекенни пулмарĕ. Вăл мечĕке 170 хутчен сиктерсе рекорд турĕ.

Юр çинче футболла выляни те пулчĕ. «Юбилейнăй» команда çĕнтерÿçĕ пулса тăчĕ, Е.Герасимов, М.Падюков, Н.Мытин, Н.Миронов «Чи лайăх футболистсем» ята тивĕçрĕç. Ăмăрту çĕнтерÿçисене пурне те Хисеп грамоти тата парне парса чысларĕç.

Спорт ăмăртăвĕсене ирттерме РОСТО Канашĕн председателĕ В.Егоров, Питĕркассинчи шкул директорĕ А.Дерстуганов спонсорла пулăшу панă.