Икĕ çул каялла ноябрĕн 11-мĕшĕнче пирĕн районшăн питĕ йывăр çухату пулчĕ. Пирĕн ентеш, Чăваш патшалăх академи драма театрĕн актриси Ирина Алексеевна Садовникова (хĕр чухнехи хушамачĕ Никитина) чире пула ĕмĕрлĕхех куçне хупса пирĕнпе сыв пуллашрĕ.

Сентябрĕн 15-мĕшĕн­че И.А. Садовникована асăнса унăн тăван килĕ умĕнче Асăну хăми уçас енĕпе торжествăлла митинг иртрĕ. Ăна Чăваш патшалăх академи драма театрĕн режиссерĕ А.Н. Павлов уçнине палăртмалла. Унтан райадминистраци пуçлăхĕн çумĕ Н.Ф. Яхатин илемлĕ те пултаруллă актрисăпа паллашма тÿр килнине аса илчĕ, Ирина Алексеевнан пурнăçĕ кĕске пулнишĕн чунтан пăшăрханнине тата вăл Чутай халăхĕн чĕринче яланах асра юлассине пĕлтерчĕ. А.Н. Павлов режиссер И.А. Садовникова пирки ыррине кăна калама пултарчĕ.

- Ирина тĕлĕнмелле психологиллĕ çынччĕ. Вăл хăйĕн сăнарĕсене ĕненмелле вылятчĕ, хăйĕн таланчĕпе уйрăлса тăратчĕ, чăн-чăн çăлтăр евĕр йăлкăшатчĕ, - терĕ Андриян Николаевич.

Раççей халăх артистки Н.М. Яковлева та сăмах илсе Ирина Алексеевнана ырă хак пачĕ.

- Ирина хăйĕн пурнăçне театра парнелерĕ. Унăн пултарулăхĕ иксĕлмиччĕ, таланчĕ те куç тулличчĕ. Илемлĕ сăнĕ, янăравлă сассипе кулли, хусканăвĕ, ташлама пултарни - унăн пурте пурччĕ. Театрта ĕçленĕ кĕске вăхăтрах вăл чылай сăнар туптарĕ, вĕсем татах та нумай пулмаллаччĕ. Анчах та пурнăç çулĕ кĕске пулчĕ Иринăн. Вăл куракансен асĕнчен ĕмĕрте тухас çук. Эпир те, унсăр 2 сезон ĕçлетпĕр пулин те, пире Ирина çитменнине туйсах тăратпăр, - пĕлтерчĕ Нина Михайловна. Вăл хăйĕн сăмахне театрта ĕçлекен А. Большаков сăвăç Ирина çинчен ятарласа çырнă сăвă йĕркисемпе вĕçлерĕ.

И.А. Садовникова пирки Р.Г. Галимов та аса илчĕ. Хĕр унăн куçĕ умĕнчех ÿснĕ темелле. 6 класран пуçласа Ирина Роберт Геннадьевич ертсе пыракан театр студине çÿреме тытăннă. Унтах хăйĕн пултарулăхĕпе палăрнă хĕр.

Иринăпа пĕрле театрта ĕçленĕ ĕçтешсен ячĕпе Н. Гордеев тата  А. Зайцева артистсем сăмах каларĕç. Чунĕпе пуян Ирина Алексеевнан ĕмĕрĕ кĕске пулнишĕн хурланнине пĕлтерчĕç. Унăн ролĕсене урăххисем вылясан та сцена çинче яланах ăна курнине палăртса хăварчĕç.

Шкулта пĕр класра вĕреннĕ И. Чубайкина та хăйĕн тус-юлташне ăшшăн та хумханса аса илчĕ. Шкул пурнăçĕнче те И.А. Садовникова яланах активлăхпа палăрнине асăнчĕ. Мĕн ачаранах актриса пулма ĕмĕтленнĕ Иринăна яланах ăшшăн аса илессе пĕлтерчĕ.

Паллă та пултаруллă ентеше чысласа Асăну хăми уçма унăн чун тĕпренчĕкне, Петя ывăлне, шанса пачĕç. Малашне иртен-çÿрен çак сăваплă çуртра Ирина Садовникова çуралса ÿснине яланах пĕлсе тăрĕ, унăн çутă сăнарне асра тытĕ.

Унтан митинга пухăннисем Ирина Алексеевнан вил тăпри çине кайса пуç тайрĕç, илемлĕ чечек çыххисем хурса хăварчĕç.