Июнĕн 30-мĕшĕнче Етĕрнери 25-мĕш номерлĕ профессиллĕ лицейăн Хĕрлĕ Чутайри филиалĕнче вĕренсе тухакансен ăсату каçĕ иртрĕ. Савăнăçлă, çав хушăрах пăлхануллă мероприятие райадминистрацин пуçлăхĕ В. Орлов, Етĕрнери 25-мĕш номерлĕ профессиллĕ лицейăн директорĕ В. Мартьянов, район администрацийĕн вĕрентÿÿ, çамрăксен политикин тата физкультурăпа спорт управленийĕн начальникĕ А. Тверсков, Хĕрлĕ Чутай ял администраци пуçлăхĕ В. Романов, кунти педагогсем, ашшĕ-амăшĕсем пухăнчĕç. Сумлă хăнасем çамрăксене профессиллĕ специалистсем пулса тăнă ятпа ăшшăн саламларĕç, пурнăçра ăнăçу, телей сунчĕç.

Филиалта пĕлтĕр вĕренÿ çулне 202 çамрăк тытăннă, иккĕмĕш курса 95 вĕренекен куçнă, 82-шĕ кăçал диплом ĕçĕсене ăнăçлă хÿтĕлесе алла документ илнĕ. Çак йышран 15-шĕ свидетельство илнĕ, 4-шне тĕрлĕ сăлтавсене пула дипломсем паман, вĕсене справкăсемпе тивĕçтернĕ.

Лицей филиалĕнче виçĕ профессие алла илме пулать. Акă, строительство ĕçне суйласа илекенсем пурĕ 47 çамрăк. Палăртма кăмăллă, вĕсенчен 5-шĕ вĕренÿ çулне Хĕрлĕ дипломпа пĕтернĕ. Повар-кондитер специальноçне суйласа илекенсем 23-ĕн. Çак йышран виçĕ çамрăкĕ Хĕрлĕ диплом илме тивĕç пулнă. Ял хуçалăх производствинчи тракторист-машинист специальноçне 12 çамрăк килĕштернĕ.

Филиалти опытлă педагогсем, производство ăстисем вĕренекенсене малашне те тарăн пĕлÿ парса ял хуçалăхĕнче кирлĕ профессисене алла илме пулăшасса шанас килет.