Кĕçнерни кун, июнĕн 16-мĕшĕнче, райадминистрацин пуçлăхĕ çумĕнчи коллегин черетлĕ ларăвĕ пулчĕ. Лару ку хутĕнче, райадминистрацин ларусем ирттермелли Пысăк залĕнче мар, “Коминтерн” хуçалăхра иртрĕ. Ларăва коллегин членĕсем, ял администрацийĕсен пуçлăхĕсем, предприятисемпе ял хуçалăх производство кооперативĕсен ертÿçисем, райадминистраци пайĕсен начальникĕсем хутшăнчĕç.

Коллеги ларăвĕн ĕçне райадминистраци пуçлăхĕ В. Орлов ертсе пычĕ. Пухăннисем кун йĕркинче 3 ыйтăва сÿтсе яврĕç.

Малтанах ларăва пухăннисем “Коминтерн” хуçалăхĕн ĕçĕ-хĕлĕпе паллашрĕç, çĕнĕлĕхсене ăша хыврĕç.

Ĕçлеме ÿркенмен пурăнать тетпĕр. Чăнах та, çапла. “Коминтерн” ял хуçалăх производство кооперативĕ пирки çак сăмахсенех калама пулать. Пултаруллă ĕçченсем, хĕрÿ ĕçре - техника тĕп вăй пулнине шута илсе,  техника паркне çĕнетсех тăраççĕ. Акă, май уйăхĕ вĕçĕнче хуçалăх “Дон-680” комбайн туянма пултарнă, иртнĕ шăмат кун вара çĕнĕ йышши ют çĕршыври техникăсемпе пуянланнă. Палăртма кăмăллă, кун йышши тракторсем (ÿкерчĕксенче) республикăри виçĕ хуçалăхра çеç усă кураççĕ. Вĕсенчен пĕри - пирĕн районти “Коминтерн” хуçалăх.

Кун йĕркипе килĕ­шÿллĕн малалла УАО “Гидравлика” ĕçĕ-хĕлĕпе унăн директорĕ В.Д.Селиванов паллаштарчĕ. Владимир Дмитриевич хăйĕн сăмахĕнче халăха тĕрлĕ йышши пулăшу (тимĕр хапхасемпе решеткесем (карта тытмалли) туса парасси, çĕвĕ тата техника енчен пулăшасси тата ытти те) панипе пĕрлех ыттисемпе танлаштарсан хакĕсем йÿнĕ­рех пулнине палăртрĕ.

Районта халăхăн ирĕклĕ дружинине йĕркелесе яни пирки унăн председателĕ, райадминистрацин вĕрентÿÿ, çамрăксемпе ĕçлекен, физкультурăпа спорт пайĕн пуçлăхĕн çумĕ А.М. Никитин каласа пачĕ.

Юлашкинчен ларăва пĕтĕмлетнĕ май райадминистраци пуçлăхĕ В.Г. Орлов йĕркесĕрлĕхе пĕтерес енĕпе пурне те курнă куçа курман пек туса ирттермелле маррине тата шанса панă ĕçе чыслăн пурнăçлама хушса хăварчĕ.