Районти 23-мĕш номерлĕ аптекăра химипе фармацевтика фабрикисенче туса кăларнă тата вырăнта хатĕрленĕ эмелсем сутаççĕ. Вĕсем тĕрлĕ чир-чĕрпе асапланакансене çăмăллăх кÿреççĕ, сывалма пулăшаççĕ. Çавăнпах кунтан халăх татăлмасть. Аптека  ĕçченĕсем вĕсен ыйтăвĕсене çийĕнчех пурнăçлаççĕ.

Аптека коллективĕ пирки калас пулсан, кунта кашни çак ĕçре чылай çул тимлет. Акă, Наталия Валериановна Альгешкина фармацевта илер. Вăл юратнă ĕçĕнче 21 çул ĕçлет.

Н. Альгешкина Туктамăш ял хĕрĕ пулнă, телейне те çакăнтах тупнă, çемье çавăрнă.  Мăшăрĕпе 2 хĕр ÿстереççĕ. Хальхи вăхăтра хĕр пĕрчисем аслă вĕренÿ заведенийĕнче пĕлÿ илеççĕ, амăшĕ пекех шурă халатлă ĕçченсем пуласшăн.

Наталия Валериановна медицинăна кăмăлланăран, паллах, Чулхулари фармацевт училищине вĕренме кĕнĕ. Унтан ăнăçлă вĕренсе тухнă. Ĕç биографине вара Хĕрлĕ Чутайри аптекăра пуçланă. Наталия Валериановна ĕçтешсен ĕç опытне ăша хывса, вĕренсе пырса хăйĕн професси ăсталăхне ÿстерсе пынă. Халĕ вăл хăй те пĕрремĕш категориллĕ специалист. Çамрăксен унран вĕренмелли чылай. Коллективра та ăна хисеплеççĕ.

Пултаруллă, çивĕч те вăр-вар хĕрарăм обществăлла мероприятисене те хастар хутшăнать. Вăл республикăра иртнĕ “Чи лайăх фармацевт - 2005” конкурса хутшăнма тивĕç­нĕ. Унта професси ăсталăхĕ, ăс-тăн çивĕчлĕхĕ малти вырăнта пулмалла. Турри вара Наталия Валериановнана нихăш енчен те кÿрентермен.

Пилĕк район хушшинчи фармацевтсен ăмăртăвĕнче Наталия Валериановна пурĕ 22 балл пухса 3-мĕш вырăна çĕнсе илнĕ, диплом тата хаклă парне илме тивĕçнĕ.

Хастар та пултаруллă специалиста медицина ĕçченĕсен професси уявĕ ячĕпе чун-чĕререн саламлатпăр, малашнехи ĕçре ырлăх-сывлăх, çемьере килĕшÿ сунатпăр.