ЧР Президенчĕ Н. Федоров кăçал республикăри Парксемпе садсен çулталăкĕ тесе пĕлтер­нĕччĕ. Çакна тĕпе хурса пур çĕрте те йывăçсем лартас ĕçе активлă хутшăнчĕç. Сăмах май, Етĕрнепе Элĕк районĕсен чиккинче вырнаçнă “Свобода” колхоза кĕрекен Акташ ялне илсе пăхар-ха. Çак пĕчĕк ялăн урамĕ тарăнах мар çырма хĕррипе тăсăлать. Колхозниксен кил-çурчĕсем çырман икĕ хĕррипе вырнаçнă. Темиçе çул каярах кунта лартса чĕртнĕ йăмрасем кашлаççĕ, пĕвесенче хур-кăвакал тата ачасем савăнаççĕ. Пĕчĕк ялшăн, паллах, тăватă пĕве сахал мар. Пушар тухас пулсан та пĕве-шыв кирлех. Çавăнпа та пĕвесене çурхи шыв-шуртан çулсеренех упраса хăвараççĕ.

Йывăç лартас уйăхлăха та ял çыннисем усăсăр ирттерсе яма­рĕç. Кашниех хăй кăмăлланă йывăç турат лартма тăрăшрĕ.

- Эпир те, çитмĕл çиччĕри тăван аттепе, хамăр кил умĕнчи çырмана вуншар тĕп хурăн, йăмра, хурама чиксе хăвартăмăр. Ял илемĕшĕн вăй хума яланах хатĕр, -  тет кунсеренех колхоз ĕçĕсене çÿрекен Виталий Николаевич Никитин.