Нумаях пулмасть районта ачасемпе çамрăксен спорт шкулĕнче Чăваш Ен кубокне çĕнсе илессишĕн кире пуканĕ йăтассипе республикăри ăмăрту иртрĕ. Хĕрлĕ Чутайри, Шупашкарти, Етĕрнери пăхаттирсен тупăшăвне курма, вĕсен ÿсĕмĕсемшĕн пĕрле савăнма питех те кăмăллă пулчĕ. Уйрăмах хĕрсем кире пуканĕ йăтассипе тупăшни - сăнама интереслĕ.

Ăмăртăва 55 килограмм таякан яш каччăсем пуçларĕç. 24 килограмлă кире пуканне йăтса пĕрремĕш вырăна С.Миронов (Хĕрлĕ Чутай гимназийĕ) тивĕçлипех çĕнсе илчĕ. Иккĕмĕш вырăн та хĕрлĕчутайсененче пулчĕ, ăна Н.Разумкин тивĕçрĕ.

60 килограмлă виçеллисем хушшинче пĕр­ремĕш -  А.Савельев  (Атнар), иккĕмĕш - А. Глухов (Етĕрнери 25-мĕш номерлĕ лицейăн районти филиалĕ) пулчĕ.

 65 “килограмлисем” хушшинче Туктамăш каччи  А.Тихонов палăрчĕ. Сăмах май, вăл - ял хуçалăх академийĕн студенчĕ. Пултаруллă спортсмен вăйăсене хутшăнсах тăрать, район чысне хÿтĕлет.

Йывăр виçеллисем хушшинче вăй-халĕ чăннипе те çирĕппине С.Дадюков (Хĕрлĕ Чутай),  иккĕмĕш - Г.Шурбя (Хĕрлĕ Чутай гимназийĕ) палăртрĕç.

Хĕр ачасенчен Атнарти вăтам шкулта 6 класра вĕренекен Э.Габухаевана парăнтараканни пулмарĕ. Вăл - чемпион.

Ăмăрту малти вырăнсене пурне те Хĕрлĕ Чутай çамрăкĕсем çĕнсе илнипе палăрса юлчĕ. Анчах аслăрах çулсенчи арçынсем хушшинче хăнасем маттуртарах пулни сисĕнчĕ.

Ăмăрту ирттерме спонсорла пулăшу парса пулăшнăшăн В.Ульянов тата çак ăмăртура  судьян тивĕçне пурнăçлакансем - В.Савельев (ШĔП), В.Мереськин (лицей), Ю.Васильев тата А.Егоров (спорт шкулĕ) тав сăмахĕсене тивĕç.