Ноябрĕн 25-мĕшĕнче районти Культура керменĕнче Афган тата Чечен вăрçисенче пуçне хунă хамăр район салтакĕсене (Г.Иванова, Ю.Макарова, С.Эзенкина)  халалланă патриотла çар юррисен фестивалĕ иртрĕ.

Фестивале район администрацийĕн пуçлăхĕ В.Г.Орлов уçрĕ, пухăннисене уяв ячĕпе саламларĕ. Хăйсен интернационалла тивĕçне тÿрĕ кăмăлпа хастаррăн, хăюллăн пурнăçласа хаяр çапăçусенче пуçĕсене хунă салтаксен ячĕсем тата вĕсен паттăрлăхĕ нихăçан та пирĕн асран тухас çуккине палăртрĕ.

Районти çар ĕç комиссарĕн çумĕ О.Павлов вăрçă вăхăтĕнче юрă салтаксене тăшмана хирĕç кĕрешме хавхалантарнине, йывăр вăхăтра та, савăнăçлă самантсенче те вăл вĕсен чĕрисене ăшăтнине, тăван киле, атте-аннене аса илтернине каларĕ.

Фестивале райадминистрацин культура управленийĕн начальникĕ З.Спиридонова ертсе пычĕ. Çамрăк юрăçсем - К.Романова, Э.Габдухаева, А.Петров, А.Сорокин, Е.Васильев, Н.Петров, О.Чернова, Р.Сулейманов, М.Балковский тата ыттисем те патриотла çар юррисене мăнаçлăн шăрантарчĕç.  Уйрăмах К.Романова (“Баллада о солдате”), Э.Габдухаева (“Прекрасное далеко”), А.Петров (“Смуглянка”), М.Балковский, Е.Васильев, Г.Катейкина юрланă юрăсем куракансен кăмăлне кайрĕç.

Фестивале “Хĕвел” ача-пăча садне çÿрекенсем, “Акцент” ушкăн (А.Дмитриевпа Ю.Серин) хастар хутшăнчĕç.

Юлашкинчен жюри членĕсем фестивале пĕтĕм­летрĕç, ачасен пултарулăхне хакларĕç. Çапла майпа, кĕçĕннисен ушкăнĕнчен 1-мĕш вырăна - К.Романова, 2-мĕш - О.Чернова, 3-мĕш - пĕртăван Петровсем, аслисен ушкăнĕнчен 1-мĕш вырăна - М.Балковский, 2-мĕш - Е.Васильев, 3-мĕш - Г.Катейкина илме тивĕç пулчĕç.