Октябрĕн 6-мĕшĕнче районти учительсем, ача-пăча учрежденийĕсенче тăрăшакансем спортпа туслă пулнине уççăн çирĕплетрĕç.

Палăртнă вăхăт тĕлне райцентрти тĕп стадион спорт тумĕ тăхăннă  вĕрентÿ ĕçĕнче ĕçлекенсемпе тулчĕ. Учительсен кунне халалланă спорт уявне ачасемпе çамрăксен спорт шкулĕн директорĕ Ю.И. Столяров уçрĕ, районти вĕрентÿ пайĕн ертуçине А.И.Тверскова сăмах пачĕ. Анатолий Иванович учительсене ăшшăн саламласа ăнăçлă старт, пысăк çĕнтерÿ сунчĕ. Вĕрентÿ пайĕн методисчĕ А.П.Кузьмин ăмăрту ирттерес йĕркепе паллаштарчĕ. Спорт мастерĕн кандидачĕ, халăха вĕрентес ĕç отличникĕ Л.А.Михуткина ЧР ялавне çĕклерĕ.

Чи малтан «Атте, анне тата эпĕ - спортпа туслă çемье» эстафета иртрĕ. 11 çула çитмен ачасем ашшĕ-амăшĕсемпе (пурĕ 6 çемье) старта тухрĕç. Хĕрÿ ăмăртура Эдуард Васильевичпа Ирина Алексеевна Романовсем (Хĕрлĕ Чутай гимназийĕ) тата вĕсен хĕрĕ Кристина çĕнтерÿçĕсем пулчĕç. Тепĕр ушкăнра ачисем 14 çула çитеймен çемьесем тупăшрĕç. Кунта пурне те хыçа хăварса Инжебейкинсем (Шулю) малти вырăна çĕнсе илчĕç. Аслă ушкăна кĕрекеннисем (ачисем 14 çултан иртнисем) хушшинче чи вăйли Пĕрремĕш Хурашашра пурăнакан Ягодейкинсен çемйи пулчĕ.

Хĕрарăмсен эстафети çивĕч кĕрешÿре иртрĕ. Тăваттăн 200-шер метр чупса финиша пĕрремĕш Хĕрлĕ Чутай гимназийĕн учителĕсем çитрĕç, иккĕмĕшсем - мăнэтменсем, виççĕмĕшсем - çĕнатикассисем. Арçынсем хушшинче  те чи малтисем хĕрлĕчутайсем пулчĕç. Çак ушкăнрах Етĕрне училищин районти филиалĕнче вĕрентекенсем ăнăçлă ăмăртнине палăртмалла.

Хутăш эстафетăна (2 арçын, 2 хĕрарăм) спорт ветеранĕсем хутшăнчĕç. Ăнăçу хĕрлĕчутайсенче пулчĕ, иккĕмĕш вырăнта - питĕркассисем, виççĕмĕшсем - хурашашсем.

800 метрлă дистанцие чи çамрăк учительсем йышлă тухрĕç. Хĕрарăмсенчен финиша Г.Тарасова (Шулю шкулĕ) пĕрремĕш çитрĕ, уяв парнине тивĕçрĕ. Арçынсенчен пурне те чылай хыçа хăварса чемпион ятне Евгений Патьянов (Хĕрлĕ Чутай гимназийĕ) çĕнсе илчĕ. Сăмах май, хальлĕхе районта çăмăл атлетика енĕпе Женьăна çитекенни çук. Хăюллă та чăтăмлă, йăрăс пÿллĕ каччă спортра ÿсĕм хыççăн ÿсĕм тăвать.

40 çула çитменнисем (арçынсем) 800 метрлă дистанцире ăмăртрĕç. Ăсталăх кăтартса финиша чи малтан И.Сатлайкин (Штанаш) çитрĕ, иккĕмĕш - Н.Храмов (Хăмаркка). Хĕрарăмсенчен 400 метра чупассипе Хĕрлĕ Чутай гимназийĕн физкультура учителĕ Г.Мидейкина палăрчĕ.

49 çулсенчи арçынсем 300 метрлă дистанцире тупăшрĕç. Серенкассинчи тĕп шкул директорĕ Н.Михеев финиша чи малтан çитрĕ, иккĕмĕш - В.Герасимов (спорт шкулĕн тренерĕ), виççĕмĕш - Е.Инжебейкин (Шулю). Çак çулхи хĕрарăмсенчен пĕрремĕш вырăна Т.Долгова (вĕрентÿ пайĕн бухгалтерĕ) тивĕçлипех çĕнсе илчĕ, иккĕмĕш - И.Михеева (Мăн Этмен), виççĕмĕш Э.Смелова (Тури Çĕрпÿкасси).

50 çултан иртнĕ педагогсем 300 метрлă дистанцири тупăшăва хутшăнчĕç. В.Ягодейкинпа (Пĕрремĕш Хурашаш) В.Ярабаев (Мăн Этмен) хушшинче кĕрешÿ вăйлансах пычĕ. Финиша Валерий Евгеньевич çитрĕ темелле, анчах спортра тем те пулать. В.Ярабаев айăпне пула чемпион ята виççĕмĕш пыракан Б.Вазиков (Атнар) тивĕçрĕ. В.Ягодейкин вара иккĕмĕш вырăна юлчĕ. Хĕрарăмсенчен çак дистанцирех ăнăçу Р.Никитина енче пулчĕ, иккĕмĕшпе виççĕмĕш вырăнсене Çĕн Атикасси шкул директорĕпе А.Алексеевапа Мăн Этменти шкул директорĕ М.Ярадаева пайларĕç.

Çĕнтерÿçĕсене пурне те Хисеп грамотисемпе тата укçан преми парса чысларĕç.