Сентябрĕн 22-мĕшĕнче республикăри районсенчи апатлану предприятийĕсен (общепит) ертÿçисем Чутайри ĕçтешĕсем патĕнче ĕçлĕ канашлу ирттерчĕç. Ăна Чăвашпотребсоюз правленийĕн председателĕн заместителĕ Надежда Ивановна Наумова ертсе пычĕ. Унпа пĕрле Чăвашпотребсоюз çумĕнчи обществăлла апатлану тытăмĕнчи суту-илÿ ĕçĕсене шайлаштарса пыракан пай ертÿçи Ольга Геннадьевна Иванова килнĕ.

Хăнасене район администрацийĕн пуçлăхĕн пĕр­ремĕш заместителĕ Г.И.Ярлов, райпо Канашĕн председателĕн çумĕ Валентина Альбертовна Васькова, районти общепит директорĕ Валентина Дмитриевна Патьянова кĕтсе илчĕç. Канашлу пуçланиччен хăнасем Мăн Этменти магазинта, “Хăтлăх” (“Уют”) кафере, райцентрти “Кулинари” лавккинче, “Хурăн” (“Березка”) ресторанта, “Янтарь” ООО производство пĕрлешĕвĕнче, 1-мĕш номерлă столовăйĕнче тата  кондитер цехĕнче пулса курма тата  вĕсен ĕç кăтартăвĕсемпе паллашма кăмăл турĕç.

Ĕçлĕ канашлура малтанах общепит тытăмĕсен ертÿçисене Г.И.Ярлов кĕскен район экономикипе паллаштарчĕ. Райадминистраци суту-илÿ предприятийĕсен ĕçне курса-пĕлсе тăрать. Суту-илÿ тытăмне кĕрекен объектсем пурте юридици енчен хăй тĕллĕн, коммерци мелĕпе ĕçлесе пыраççĕ. Эрех-сăра сутма ирĕк паракан лицензие райпо тытăмĕнчи магазинсене кăна панă. Ку вăл çак таварсен пахалăхне ÿстерме, сăнаса тăма май парать. Пĕчĕк бизнес тăвакан сутуçăсен эрех-сăра сутма ирĕк çук. Районти промышленноç предприятийĕсем:  райпо тытăмне кĕрекен “Четайский” хуçалăх (çăкăр завочĕ), “Янтарь” производство пĕр­лешĕвĕ тата вăрман хуçалăхĕ ăнăçлăн ĕçлесе пыраççĕ. Вĕсем кăларакан таварсене вырăнта кăна мар, республикăра та туянаççĕ.

Юлашки вăхăтра суту-илÿ тытăмĕнче ĕç пахалăхĕ, культура шайĕ ÿссе пыни сисĕнет. Çак пулăма суту-илÿ объекчĕсене çĕнетсе юсани (евроюсав), шалти илемлĕх (интерьер) çине тимлĕх уйăрни палăрмаллах пулăшать. Кăçал Хĕрлĕ Чутай  Кивĕ центрĕнчи ресторан çурчĕ тĕпрен çĕнелсе улшăнчĕ. Унăн илемĕпе киленсе мăнаçланма пултараççĕ Чутай Ен çыннисем.

Район бюджетне налук укçи хывас енĕпе райпо район шайĕнче виççĕмĕш вырăн йышăнать.

В.А.Васькова каланă тăрăх, районти суту-илÿ ĕçченĕсем 8 уйăх хушшинче 55 миллион тенкĕ майлă тавар çаврăнăшĕ тунă, е 122,4 процент. Тавар кăларассин калăпăшĕ - 11 млн.408,4 пин е 143,0 процент.  Общепит - 8 млн.742,9 пин тенкĕ, е 131,4 процент, вăл шутран харпăр хăйсем туса кăларнă таварĕсем - 3 млн.372, 1 пин, е 131,7 процент. Çăкăр пĕçернĕ - 6 млн.346,2 пин тенкĕлĕх, е 152,8 процент, çĕвĕ цехĕ - 280 пин тенкĕ, е 140,6 процент, тĕтĕмлекен цех - 437,1 пин тенкĕ, е 114,7 процент, кăлпасси цехĕ - 596,5 пин тенкĕ, е 146,7 процент, производство комбиначĕ - 3 млн.748,6 пин тенкĕ, е 132 процент тата ытти те.

Н.И.Наумова канашлăва малалла ертсе пынă май, обществăлла апатлану ĕçĕнчи çитменлĕхсем çинче чарăнса тăрса  ÿсĕмсем тума май паракан мелсене тупса пурнăçа кĕртме сĕнÿсем пачĕ. Уйрăмах вăл суту-илÿ предприятийĕсен çумĕнчи вырăнсене тирпейлĕ тытма кирлине асăрхаттарчĕ, суту-илÿ ĕçĕнчи культура шайне ÿстерес пирки каларĕ, суту-илÿ çурчĕсенче кирлĕ пек юсав ĕçĕсем туса ирттермеллине палăртрĕ. Районсенче кулинари магазинĕсем, ресторансем уçасси çине тимлĕх уйăрмаллине асăнчĕ, тавар ассортиментне анлăлатасси, оборудовани (холодильниксем, савăт-сапа) кирлĕ чухлĕ, тивĕçлĕ шайра пулмаллине çирĕплетсе пачĕ, хăвăрт пăсăлакан таварсене транспортпа турттарнă чухне ветеринари, санитари службисен нормисене тивĕçтермеллине, документсем йĕркеллĕ пулма кирлине асăрхаттарчĕ, япаласене (таварсене) илемлĕ чĕркеме (упаковка) вĕренмеллине те манса хăвармарĕ. Унтан пухăннисем районсенчен килнĕ уйрăм çынсен отчечĕсене итлерĕç.

Чăвашпотребсоюз çумĕнчи обществăлла апатлану тытăмĕнчи ĕçсене йĕркелекен пай пуçлăхĕ О.Г.Иванова суту-илÿ ĕçченĕсен вăхăтра курссемпе семинарсенче хăйсен пĕлĕвне, ăсталăхне ÿстерме кирлине палăртрĕ. Чăваш Енре, уйрăмах районсенчи,  аслă поварсен, буфетчицăсен пĕлÿ шайĕ тивĕçлĕ маррине уйрăмах çирĕплетсе каларĕ. Апат-çимĕç хатĕрленĕ чухне фирмăллă, дессертлă çимĕçсем, сĕт-çупа, пахча çимĕçпе пĕçернĕ апатсем пулма кирлине ас тутарчĕ. Диета тытакан çынсем валли пулăран, тинĕс продукчĕсенчен хатĕрленĕ, çурма хатĕр (полуфабрикат) апат-çимĕç пулма кирлине те манмалла мар.

Юлашкинчен райпо Канашĕн председателĕ А.Ю. Степанов хăнасене Чутай Енне килсе курнишĕн, усăллă сĕнÿсем панишĕн тав турĕ, ĕçре ăнăçу, ырлăх-сывлăх сунчĕ.