Июнĕн 28-мĕшĕнче Етĕрнери 25 номерлĕ профессиллĕ лицейăн Хĕрлĕ Чутайри филиалĕнчен вĕренсе тухакансем диплом ĕçĕсене хÿтĕлерĕç. Тепĕр кунтан кунта ăсату каçĕ ирттерчĕç. Дипломсене пама лицей директорĕ Владислав Васильевич Мартьянов ятарласа килнĕ. Филиал заведующийĕпе Светлана Петровна Куропаткинапа пĕрле выпускниксене дипломсем парса саламларĕç, пурнăçра ăнăçу, телей сунчĕç. Çавăн пекех Любовь Николаевна Романова, Владимир Александрович Васильев, Ольга Николаевна Фондеркина, Валентин Николаевич Матюшкин мастерсем те çамрăксене профессиллĕ специалистсем пулса тăнă ятпа ăшă сăмахсем каларĕç.

Филиалта пĕлтĕр вĕренÿ çулне 218 çамрăк тытăннă, II курсра 116 ача пĕлÿ пухнă. 91-шĕ кăçал диплом ĕçĕсене ăнăçлă хÿтĕлесе алла документ илнĕ, 22-шне тĕрлĕ сăлтавсене пула дипломсем паман, вĕсем справкăсемпех çырлахнă. Сăмах май, вĕсем тепĕр çур çултан диплом ĕçĕсене хÿтĕлесе документ илме пултараççĕ.

Çамрăксене хăйсен специальноçĕпе - виççĕмĕш разряд, «4» тата «5» паллăсемпе вĕренсе ăнăçлă хÿтĕленнисене тÿрех тăваттăмĕш разряд параççĕ. Кун пек специалистсен хисепĕ пысăк.

Лицей филиалĕнче виçĕ профессие вĕрентеççĕ. Акă, повар-кондитер. Ку специальноçа суйласа илнисем пĕрремĕш курсра - 26-ăн, иккĕмĕшĕнче 25-ĕн пулнă. Производство вĕрентĕвĕн мастерĕ - Любовь Николаевна Романова. Вăл çамрăк специалист, педуниверситетри технологипе экономика факультетĕнче 2-мĕш курсра куçăмсăр майпа вĕренет. Тăваттăмĕш разрядлă повар-кондитерсем хушшинче Надежда Толстова, Георгий Максимов, Светлана Михуткина, Альбина Кошелева, Ольга Родионова тата ыттисем те.

Строительство ĕçĕсен ăстин профессине пĕрремĕшпе иккĕмĕш курссенче 55-шерĕн вĕреннĕ. Пĕлÿ параканĕсем - Валентин Николаевич Матюшкинпа Ольга Николаевна Фондеркина мастерсем. Пĕри Шупашкарти строительство техникумĕнчен вĕренсе тухнă, тепри Ленинградри строительство техникумне пĕтернĕ, халĕ куçăмсăр майпа Чăваш патшалăх университечĕн строительство факультечĕн тăваттăмĕш курсĕнче пĕлÿ пухать.

Ку профессие кăмăлланă çамрăксенчен: Женя Охливанкин, Женя Андрианов, Виталий Глухов, Владимир Окайкин, Александр Петров, Александр Ярандайкин тата ыттисем те тăваттăмĕш разряда тивĕçнĕ.

Ял хуçалăх производствинчи тракторист-машинистсен ушкăнĕнче пĕрремĕш курсра - 21, иккĕмĕшĕнче 25 вĕренекен пулнă. Вĕсене Владимир Александрович Васильев вĕрентет. Лайăх ĕлкĕрсе пыракансен йышне Вячеслав Михеева, Василий Порейкина, Александр Сергеева кĕртмелле.

- Çитес вĕренÿ çулĕнче çамрăксем кăçалхинчен кая мар пулмалла, - теççĕ лицей ертÿçисем. - Хальхи виçĕ профессие вĕрентесси малалла та пулать, унсăр пуçне кунта çĕнĕ специальноçсем - çĕвĕçсем (портной) тата теплицăсенче пахча çимĕç ÿстерекен ăстасене вĕрентме палăртаççĕ. Паллах, ачасем пухăнса çитсен.

Вĕренекенсене куллен пĕр хут тÿлевсĕр апат çитереççĕ, хакĕ 16-20 тенкĕпе танлашать, уйăхне 140 тенкĕ стипенди параççĕ.

Професси ăсталăхне хăнăхма практика шучĕпе Чулхула облаçĕнчи «Ждановский» ЯХПК-на ĕçлеме çÿреççĕ вĕренекенсем, уйăхра 2-шер пин тенкĕ таран ĕçлесе илме пултараççĕ.

Лицей филиалĕн вĕренмелли бази çирĕпленсе пырать. Малтан йĕркелесе яма йывăр пулнă-ха, халĕ ку енĕпе ÿсĕмсем пур: вĕренÿ пособийĕсемпе тата кĕнекесемпе Етĕрнери лицей тивĕçтерет, сĕтел-пукан, партăсем тупса çитернĕ, груз турттармалли ГАЗ-53 машина, «Беларусь» трактор, плуг пур, филиалта столовăй ĕçлет, кунтах повар ĕçне хăнăхакансене валли лаборатори пÿлĕмĕ уçма палăртнă.

Филиалта опытлă 18 педагог тата производство ăстисем ĕçлеççĕ. Пурте ятарлă пĕлÿ илнĕ, çиччĕшĕ - аслă пĕлÿллĕ, виççĕшĕ университетсенче кусăмсăр майпа пĕлĕвĕсене ÿстереççĕ. Филиал ертÿçи С.П.Куропаткина коллектива ăнăçлă ертсе пырать, пуринчен те çирĕп ыйтать. Ачасене вăл хăй те вĕрентет: ĕç культурине, ĕç шыравĕн технологине тата каçхи классенче вырăс чĕлхипе литературине.

Пĕтĕмĕшле илсен, филиалта илнĕ профессисем пурнăçра питĕ кирлĕ. Кăçалхи выпускниксенчен çуррине яхăн халех ĕç вырăнĕ тупнă ĕнтĕ.