Райадминистраци пуçлăхĕ В.Г.Орловăн йышăнăвĕпе килĕшÿллĕн, апрелĕн 13-мĕшĕнче районтан тухнă паллă юрăçсене Иван Охливанкинпа Григорий Петрова халалланă фестиваль пулса иртрĕ. Ăна ирттерме Шупашкартан Культура институчĕн профессорĕ С.А. Кондратьев тата Чăваш патшалăх педагогика университечĕн доценчĕ З.К.Яковлева килнĕ. Вĕсем - ентешсем, районти çынсен музыка культурине аталантарас, çамрăк талантсене тупса палăртас, вĕсене вĕрентсе республика шайне кăларас тĕлĕшпе нумай вăй хураççĕ.

Фестивале хутшăнма юрăçсене виçĕ ушкăна уйăрса чĕнсе илнĕ: 1 ушкăнта - 6-12 çулхи ачасем* 2-мĕшĕнче - 13-18 çулхи çамрăксем* 3 ушкăнта 18 çултан иртнисем. Конкурса икĕ номинаципе ирттерме палăртнă: халăх тата эстрада юррисем. Конкурса Чутай, Этмен, Тралькасси, Пантьăк, Мишеркасси, Штанаш тăрăхĕнчи юрăçсем хутшăнма кăмăл тунă.

Районти Культура управленийĕн ертÿçи З.С.Спиридонова  кĕске сăмах каласа фестивале уçрĕ.

Район ертÿçи В.Г.Орлов çак фестивале ирттерме тахçанах ĕмĕтленни çинчен пĕл­терчĕ. Чаплă ентешĕмĕрсен, Иван Охливанкинпа Григорий Петровăн, музыкăна аталантарас тĕлĕшпе тунă пархатарлă ĕçĕсене палăртрĕ, çамрăк юрăçсене хамăр ентешсем пек пулма, ăсталăхпа вĕсенчен те ирттерме чĕнсе каларĕ. Çавăн пекех вăл фестивале килнĕ республикипе паллă музыка ăсчахĕсене Станислав Алексеевич Кондратьевпа Земфира Кузьминична Яковлеванпа районти çамрăксене музыкăна явăçтарассишĕн вĕрентсе çул уçса парассишĕн ырми-канми тăрăшнăшăн тав турĕ.

Хăнасем конкурса хутшăнма килнĕ çамрăк юрăçсене ăнăçу сунчĕç, саламларĕç, кун йышши  фестивальсене кашни çулах ирттерме кирлине палăртрĕç.

Конкурс пуçланас умĕн Иван Охливанкин юрланине итлерĕç, унăн янкăр уçă сассипе, юрлас ăсталăхĕпе киленчĕç.

Конкурса 21 юрăç хутшăнчĕç. Вĕсем икшер хут юрларĕç: халăх юррисен тата эстрада юррисен номинацийĕпе. Питĕ тăрăшса, кашниех хăйне евĕрлĕ ăста шăрантарчĕç. Хăйсене сцена çинче чăн-чăн артистсем пек тыткалани, илĕртÿллĕ хусканăвĕсем, ятарласа хатĕрленĕ тумĕсем залра ларакансен кăмăлне тивĕçтерчĕç, кашни номер хыççăн тăвăллăн алă çупни янăраса тăчĕ.

Пултаруллă та ăста юрăçсем сахал мар иккен Чутай тăрăхĕнче! Çакна жюри членĕсем те тивĕçлипе хак пачĕç.

Чи çамрăк юрăçсенчен жюри пĕр саслăн пулса Ирина Тверскова маттур пулнине палăртрĕ. Пĕрремĕш ушкăн юрăçисем хушшинче: Ксюша Романова - пĕрремĕш, Анжела Яруткина - иккĕмĕш, Саша Сидоров - виççĕмĕш вырăнсене йышăнчĕç. Елена Секайкина куракансен кăмăлне ытларах тивĕçтернине палăртрĕç.

Иккĕмĕш ушкăнра пĕр­ремĕш вырăна Лиана Шереметьева, иккĕмĕшне - Оля Илюшкина,виççĕмĕшне Женя Васильев йышăнчĕç. Эля Немешкина куракансен кăмăлне кайрĕ.

Виççĕмĕш ушкăнра пĕр­ремĕш вырăна Таня Кириллова, иккĕмĕшне - Лариса Кандейкина, виççĕмĕшне Оксана Тимчук тухрĕç. Куракансен кăмăлне Галина Катейкина тивĕçтерчĕ.

Мала тухнисене пурне те дипломсемпе чысларĕç, укçан преми парса хавхалантарчĕç. Оля Чикмейкина, Таня Грачева (1-мĕш ушкăн), Таня Кчеткова, Регина Чишкина, Оля Михеева (2-мĕш ушкăн), Таня Рускова, Таня Чебан, Вероника Шишкова (3-мĕш ушкăн) Хисеп грамотисене тивĕçрĕç.

Конкурс хыççăн куракансене Чутай тăрăхĕнчи паллă юрăçсем Нина Маркова, Юрий Егоров, Сергей Дмитриев, Юрий Серин, Рашид Сулейманов, районти Культура çурчĕ çумĕнчи ветерансен хорĕ хăйсен пултарулăхĕпе савăнтарчĕç.