ЧР Президенчĕ Н.Федоров республика парламентне янă «Ăс-хакăл вăйĕпе тата сывă пурнăç йĕркипе - ырлăх-телей патне» Çырăвĕ Чăваш Енĕн пурнăçпа экономика, культурăпа вĕрентÿ ÿсĕмĕ пуласса кашнин чĕринче çутă шанчăк çуратать.

     ЧР Патшалăх Канашĕн депутачĕсем Чăваш Енĕн 2010 çулчченхи социаллă пурнăçпа экономика аталанăвĕн комплекслă программине йышăннă. Халĕ вара малашлăх тĕллевсене пысăк пахалăхпа пурнăçлассишĕн кĕрешĕве вăйлатмалла. Çавăн пекех, ял хуçалăх производствин тухăçне ÿстерес, халăха ĕçпе тивĕçтерес, пурăнмалли çурт-йĕр строительствин калăпăшне ÿстерес, çамрăксене, çемьесене, сывă пурнăç йĕркине халăхра анлă сарас енĕпе кăларнă указсене çанă тавăрса пурнăçламалла.

    Сывă пурнăç йĕрки тени, чи малтанах, ăс-хакăлпа этемлĕх енчен сывă пулнине ăнлантарать. Таса тата чун хавалĕ тĕлĕ­шĕнчен пуян çын çеç пурнăçăн савăнăçĕпе ĕçĕн йĕркине курать. Культура çук пулсан, пурнăç та хăй пĕлтерĕшне çухатать. Культура шайĕ ÿсни çын пурнăçне те, экономикăна та аталанма пулăшать.

       Паянхи тĕп тĕллев - Чăваш Ене чăннипех цивилизациллĕ тата пысăк культурăллă, тарăн пĕлÿллĕ, технологи енчен аталаннă, инновациллĕ регион туса хурасси. Çакăншăн тăрăшса ĕçлеме чĕнет ЧР Президенчĕ Н.Федоров хăйĕн Патшалăх Канашне янă Çырăвĕнче. Çав тĕллевпе Николай Васильевич пĕтĕм Чăваш Ен хула-ял çыннисене Çурхи Ырă ĕçсен эрнине хутшăнма чĕнет. Вăл апрелĕн 16-24-мĕшĕсенче иртмелле.

       Çак акцие районти пур организацисемпе предприятисем активлă хутшăнĕç. Апрелĕн 16-24-мĕшĕсенче райцентрта, мĕн пур ялта, организацисемпе предприятисенче тавралăха тирпей-илем кĕртĕç, йывăçсем лартĕç, культура пайĕн ĕçченĕсем ыркăмăллăх концерчĕсем кăтартĕç, пĕччен пурăнакансене, ватăсене, инвалидсене, Ваттисен çурчĕсене адреслă пулăшу пама укçа-тенкĕ, япаласем, кĕнекесем, теттесем пухĕç.

     Асăннă акци çынсене татах та пĕрлештерессе, çывăхлантарасса, чунпа тасарах пулма, çынна ырă тума вĕрентессе шанас килет.