Хĕрарăм ертÿçĕ пулнинчен тĕлĕнме пăрахрăмăр ĕнтĕ. Халĕ Раççейĕпех, çавăн пекех районта та ертÿçĕ тилхепине хĕрарăмсене шанса параççĕ, вĕсен йышĕ çулран çул ÿссе пырать. Ку ахальтен мар, паллах. Мĕншĕн тесен хĕрарăм ĕçленĕ вырăнта яланах йĕркелĕхпе тирпейлĕх хуçаланать. Акă, А.Б.Новикова «Коминтерн» ял хуçалăх кооперативне 10 çул ытла ăнăçлă ертсе пырать. Вăл хăйĕн тăрăшулăхĕпе «Чăваш Республикин тава тивĕçлĕ ял хуçалăх ĕçченĕ» ята илме тивĕçрĕ.

Çавăн пекех В.Д.Патьянова ертсе пынипе ТЯО «Обществăлла апатлану” предприяти тупăшлă ĕçлесе пырать. Вăл та хăй ĕçĕнче пуян опыт пухнă, ырă ята тивĕçлĕ ертÿçĕ. Тĕслĕхрен, предприяти кăçалхи 2 уйăхра тавар çаврăнăшне 135 процент таран ÿстернĕ, кондитер изделийĕсене туса кăларассине 123 процент тултарнă.

Районта 38 предприятипе организаци шутланаççĕ, вĕсенчен чылайăшĕнче хĕрарăм-ертÿçĕсем. Пурте хăйсен умĕнчи тивĕçĕсене тÿрĕ кăмăлпа пурнăçласа пыраççĕ.

Мартăн 6-мĕшĕнче ларусем ирттермелли Пысăк залра райадминистраци пуçлăхĕ В.Орлов ырă кăмăллă, пултаруллă та пуçаруллă, кил ăшшине упракан хĕрарăм-ертÿçĕсене çуркуннехи чи илемлĕ те çутă уявпа саламланă. Хĕрлĕ Чутайри пуçламăш шкул тата ача-пăча сачĕн вĕренекенĕсем  тĕнчери хĕрарăмсене, аннесене халалласа илемлĕ юрă, сăвă парнеленĕ.