Чăваш Республикин Президенчĕ Н.В.Федоров 2003 çул Чăваш Республикинче Çемье çулĕ тесе пĕлтернĕччĕ. Çакă çемье институчĕ çине тепĕр хут çаврăнса пăхмалли, ăна тĕрлĕ енчен çирĕплетме тăрăшмалли сăлтав пулчĕ.

Эпĕ хамăн ĕçлĕ çулçÿревре Тралькасси ял администрацийĕнче пулнă май, шăпах, ку таврара Çемье çулĕ еплерех иртни пирки интереслентĕм.

Тралькасси ял администрацийĕ 7 яла пĕрлештерсе тăрать. Ял администрацийĕнче тăрăшакансем  пĕл­тернĕ тăрăх, пĕлтĕр кунта 40 çын вилнĕ, 10 ача çуралнă. Çамрăксем ултă çемьене чăмăртаннă. Анчах та, шел, вĕсенчен икĕ мăшăрĕ кăна ялта пурăнаççĕ. Пĕри - Елена Владимировнапа Иван Ильич Матвеевсем, тепри - Наталья Сергеевнапа Алексей Витальевич Кошелевсем. Çак асăннă икĕ çемйи те Турхан ялĕнче тĕпленнĕ. Ытти çамрăк çемьесем ялта ĕç шалăвне сахал тÿлени пирки, вĕсен пурăнмалли вырăнĕ ялта пулин те, аякри хуласенче ĕçлесе пурăнаççĕ.

Çемье хăйĕн кил-çурчĕ пулсан çирĕп пулнине пурте пĕлеççĕ. Çурт пулсан çемье тĕреклĕ, тулли, хăтлă. Ялсенче пурăнакансем Президентăн социаллă программипе килĕшÿллĕн тÿлев­сĕр е патшалăхăн тавăрса памалла мар субсидийĕсемпе усă курса пурăнмалли условисене лайăхлатрĕç тата вăрах вăхăта çăмăллăхпа паракан ипотека кредитне илчĕç (15 çула - 6 процент). Кун йышши кредитсемпе усă куракансем Тралькасси ял администрацийĕнче те пур. Акă, Алина Геннадьевнапа Владимир Иванович Мурайкинсем, Лилия Александровнапа Леонид Ильич Матвеевсем çурт-йĕр çавăрма хатĕрленеççĕ. Сергейпа Владимир Черновсем, С.М.Чулайкин, С.А. Альгешкин, А.В.Шипеев, С.В.Чернов, Г.Г.Ерофеев çемйисем аякра ĕçлесе пурăнаççĕ пулин те, малалла тăван ялтах çурт-йĕр çавăрса тĕпленесшĕн. Ю.Н.Абаськинпа Ю.А.Горланов çемйисем юлашки ĕçсене туса пĕтерсе çĕнĕ пÿрте пурăнма куçасшăн. Паллах, Тралькасси ял администрацийĕнче маларах асăннă çемьесемсĕр пуçне çурт-йĕр çавăракансем татах та нумай, анчах пурин хушаматне те асăнса пĕтереймĕн, мĕншĕн тесен кашни ялтах çĕнĕ урамсем йĕркеленеççĕ, кивĕ пÿртсем вырăнне капмар çуртсем çĕкленеççĕ...

Чăваш Енри ялсене кăçал газификацилес ĕçе вĕçлемелли пирки Чăваш Республикин Президенчĕ Н.В.Федоров ятарлă программа кăларнăччĕ. Çак программăна тĕпе хурса Тралькасси ял администрацийĕнче газификаци ыйтăвĕ тĕп вырăнта. Хальхи вăхăтра Карăкçырми ялĕнче монтаж ĕçĕсем пыраççĕ. Хăмаркка ялĕнче вара газ пăрăхĕсене çĕр айĕпе хураççĕ. Часах ку тăрăхри кашни киле “кăвак çулăм” çитĕ.

Тралькасси ял администрацийĕнче яланах йĕркел­лĕ, пур çĕрте те пултаруллă та ĕçчен çамрăксем нумай. Акă, вĕсен шутĕнче Юрий Гаврилович Воронов çемйи те. Вороновсен çемйи спортпа туслă. Пĕлтĕр вĕсем районта “Семеновăн социаллă программăсен центрĕ” йĕркеленĕ “Атте, анне тата эпĕ - спорт çемйи” вăйăна хутшăнма кăмăл тунă.