Чăваш Енре, çав шутра пирĕн районта та маттур та пултаруллă, кирек мĕнле йывăрлăха та çĕнтерсе малаллах ăнтăлакан çамрăк чылай. Вĕсене республика ертỹçисем май килнĕ таран хавхалантарма, пулăшма тăрăшаççĕ. Пĕлтĕр, калăпăр, ЧР Президенчĕн Н.Федоровăн хушăвĕпе килĕшỹллĕн вĕренỹре, тĕпчев, наука, пултарулăх, производство, управлени ĕçĕ-хĕлĕнче тата бизнес-проектсем хатĕрлес енĕпе курăмлă çитĕнỹ тунă пĕр пин çамрăкпа студент ятарлă стипенди илсе тăчĕ.
Çак ырă йăлана кăçал та прахăçламан. 2004 çулхи кăрлачăн 1-мĕшĕнчен пуçласа раштавăн 31-мĕшĕчченхи тапхăрта ЧР Президенчĕн стипендине пултаруллă студентсем, аспирантсем, преподавательсем, спортсменсем, общество организацийĕн хастарĕсем, промышленнăçра, ялхуçалăхĕнче, вĕрентỹре, культурăра, массăлла информаци хатĕрĕсенче, шалти ĕçсен пайĕнче тата ытти çĕрте тăрăшакансем илсе тăрĕç. Çак йышра пирĕн район çамрăкĕсем те пур% Евгений Анисимов - “Путь Ильича” колхоз водителĕ, Евгений Васильев - муниципалитетăн “Хĕрлĕ Чутай гимназийĕ” вĕрентỹ учрежденийĕн 10-мĕш класĕн вĕренекенĕ, Татьяна Еремеева - Хĕрлĕ Чутайри ачасен искусство шкулĕн преподавателĕ, Светлана Ильина - “Свобода” хуçалăхăн машинăпа ĕне сăвакан операторĕ, Алина Индейкина - муниципалитетăн “Хĕрлĕ Чутайри гимнази” вĕрентỹ учрежденийĕн 11-мĕш класĕн вĕренекенĕ, Николай Максимов - “Победа” хуçалăхăн тракторисчĕ, Сергей Утейкин - “Асамат” ХАО механизаторĕ.
Эпир хамăр ентешсене чун-чĕререн саламлатпăр, малашне тата пысăкрах çитĕнỹсем тума ăнăçу сунатпăр.

Первоисточник: "Наша жизнь" (Красночетайская районная газета)