Юлашки вăхăтра районта çутçантăлăк газĕ кĕртес ĕç вăй илсех пыни палăрать. Çак тĕллевпе Уйпуç ял администрцине кĕрĕкен ялсенче хĕрỹ тапхăр тăрать. Ял администрации пуçлăхĕ Анатолий Филиппович Яхатин пĕлтернĕ тăрăх ку тăрăхри ялсене çутçанталăк газне хăвăртрах илсе çитерес тĕллевпе халăхпа тăватă хутчен пуху иртернĕ, проектпа топографии ĕçĕсене туса хатĕрленĕ, часах газовиксем те килсе çитмелле. Ку ял администрацийĕнче ялсенчи урамсен тирпей-илемлĕхĕшĕн тăрăшни те куçкĕрет. Çак витĕм уйрăмах Уйпуç ялĕн Мăн урамĕнче палăрать. Ял çăвине çỹп-çапран тасатса, çĕрĕшнĕ решеткесене улăштарнă, çăва умне ритуал площадки тунă. Çавăн пекех выльăх çăвине çĕнетсе ун тавра çĕнĕ карта тытнă. Ялти çăлсене тасатса илем кĕртессипе те вăй хураççĕ кунта. Çитес вăхăтра Малиновка ялне кĕме çул тума та палăртса хăварнă ял администрацийĕнче. Август 2-мĕшĕнче Илле кунĕнче, Уйпуç ялĕн уявне паллă тума палăртнă, уяв 10сехетре пуçланмалла. Çак кун уявра ял халăхĕ ертỹçĕсен ĕçне тивĕçлĕ хак парĕ, ташласа-юрласа савăнĕ.