Игнашевич – Тумликасси мăнукĕ
Июнĕн 18-мĕшĕнче Австрири Инсбрук хулинче Евро-2008 чĕрĕк финалне тухассишĕн Раççей тата Швеци футболисчĕсем тĕл пулчĕç. Вăйă çивĕч кĕрешÿре иртрĕ, пирĕн çĕршывăн пĕрлештернĕ команди 2 : 0 шутпа çĕнтерчĕ. Çапла вара Гус Хиддинк тренер ертсе пынипе пирĕн футболистсем вăйăсене малалла та хутшăнаççĕ.
Юн кун каçхине телевиденипе кăтартнă çав матча, паллах, нумайăшĕ интересленсех пăхрĕ. Хĕрлĕ Чутайри 75 çулхи кинемей Ольга Михайловна Яковлева вара пуринчен те ытларах хумханчĕ-и, тен; Унăн мăнукĕ Сергей Игнашевич хÿтĕлевçĕ пирĕн çĕршывăн пĕрлештернĕ командин членĕ-çке! Кун пек чухне епле-ха лăпкă ларăн!
Сергейăн амăшĕ – Тумликасси хĕрĕ Раиса Германовна. Вăл кашни çулах Мускавран хăй çуралса ÿснĕ тăван яла тата район центрне – Хĕрлĕ Чутая килсе каять. Мăнукĕ кукамăшĕ валли кунта хваттер туяннă-çке. Кăçалхи çуркунне Игнашевичăн ашшĕ-амăшĕ пирĕн районта пулнă. Вĕсем каланă тăрăх, Сергей хăй ача чухне, 20 çул каялла килсе курнă Чăваш Ене, çитесшĕн.
Çакăн пек телейлĕ саманта, тен, Евро-2008 хыççăнах курăпăр.
"Пирěн пурнăç"