Асăннă ярмăрккăна Хусанушкăнь, Атнар, Штанаш ял тăрăхĕсен пуçлăхĕсем, Штанашри тĕп шкулăн директорĕ, райпо, вĕрентÿ пайĕн, Мăн Этменпе Атнар вăтам шкулĕсен, Тури Çĕрпÿкассинчи тĕп шкулăн, райадминистрацин çула çитмен çамрăксемпе ĕçлекен комиссин представителĕсем хутшăннине палăртмалла.

Ĕçпе тивĕçтерекен районти центрăн директорĕ П.П.Микишин çула çитмен çамрăксене вăхăтлăх ĕçпе тивĕçтерессине епле йĕркелени пирки, ĕç режимĕн уйрăмлăхĕсем çинчен каласа панă, йывăр лару-тăрури тата нумай ачаллă, çула çитмен çамрăксемпе ĕçлекен комиссинче тата инспекцинче учетра тăракан çемьесенчи ачасене ĕçе вырнаçтарас тĕлĕшпе мĕнле ĕçсем пурнăçлани çинчен пĕлтернĕ. Çавăн пекех Петр Петрович çуллахи вăхăтра ватă çынсене, Аслă Отечественнăй вăрçа хутшăннисене, тыл ĕçченĕсене тата ĕç ветеранĕсене килĕсене кайса социаллă пулăшу парассине йĕркелеме сĕннĕ.

Ярмăрккăна Атнар ял тăрăхĕн пуçлăхĕ А.Н.Кузнецов активлă хутшăннине палăртмалла. Вăл çитĕнекен ăрăва пысăк тимлĕх уйăрмаллине çирĕплетнĕ, çамрăксене çуллахи вăхăтра усăллă ĕçсемпе тивĕçтерме сĕннĕ.

Ĕçпе тивĕçтерекенсемпе калаçса татăлнă хыççăн çула çитмен çамрăксем валли çуллахи тапхăрта тимлеме вăхăтлăх 76 ĕç вырăнĕ йĕркеленĕ.

18 тултарман ачасене вăхăтлăх ĕç парас енĕпе аякра юлманнисем ырă сăмаха тивĕç. Çамрăксем çулла вăхăта усăллă ирттерни, ĕçе хăнăхса пыни питĕ лайăх. Вĕсен те кăшт та пулин хăйсен укçа ĕçлесе илес килет-çке.