Чăваш Ен кашни 1000 тăваткал километр пуçне хытарса тунă çулсен енĕпе Раççей Федерацийĕнче 4-мĕш, федерацин Атăлçи округĕнче 1-мĕш вырăн йышăнать.

Чăваш Республикинче район-ял муниципалитечĕсен социаллă пурнăçпа экономикине, çавăн пекех халăх пурнăçĕн шайне ÿстерес тĕллевпе 2006 çулта Николай Федоров Президент “Чăваш Республикин автомобиль çулĕсене тăвас ĕçе хăвăрт вĕçлес енĕпе пурнăçламалли мерăсем çинчен” Указ йышăннă. Унпа килĕшÿллĕн икĕ çул хушшинче пин километр ытла хытарса тунă çулсем хывмалла, 474 яла лайăх çулпа çыхăнтармалла. 2007 çулта 3, 5 миллиард тенкĕлĕх 400 километр асфальт çул хывнă. Çулсем тума пурĕ 9 миллиард тенкĕ уйăраççĕ. Указа пурнăçласа Чăваш Ен Раççейре пĕрремĕш регион çул-йĕр ыйтăвне татса парать – мĕн пур яла асфальт çулпа çыхăнтараççĕ.