Пĕр ĕмĕт шухăшпа
«Гидравлика» уçă акционерла общество коллективĕ пысăк мар – пурĕ те 18 çын кăна. Апла пулин те, пысăк ĕç тăваççĕ вĕсем. Акă, 2008 çула ĕçри çитĕнÿсемпе кĕтсе илеççĕ. Кунта хатĕрленĕ япаласене халăх лайăх кăмăл-туйăмпа туянать.
Туса кăларакан продукци ассортименчĕ пуян. Сетка-рабица, хапха, тимĕр карта тата ытти те янтлаççĕ. Рабочисем пахалăхшăн уйрăмах хытă тăрăшаççĕ. Сăмахран, Николай Юманкинах илер. Вăл сетка-рабица çыхать, ĕçре пултарулăхпа хастарлăх кăтартать. Унăн сăнне районти «Хисеп хăми» çине вырнаçтарнă.
Çĕвĕ участокĕ те пур уçă акционерлă обществăн. Зинаида Краснова, Елена Шуськина çĕвĕç-мотористкăсем тĕрлĕ сумкăсем, рюкзаксем янтлаççĕ. Вĕсен ĕç хăвăртлăхĕ те, пахалăхĕ те аван.
– Çĕнĕ çула ĕç парнисемпе кĕтсе илессишĕн кашниех вăй-халне шеллемест, – тет З.Маркова бухгалтер. – Ĕç ăнса пыни коллектив пĕр ĕмĕт-шухăшпа тăрăшнинчен, пĕр чăмăра пĕрлешнинчен нумай килет.