Апла пулин те, пурте ку енĕпе тăрăшаççĕ теме çук. Хăш-пĕр вырăнта ăратлăха çĕнетессипе пачах та ĕçлемеççĕ. Çак çитменлĕхсене пĕтерес тĕлĕшпе ĕнтĕ декабрĕн 14-мĕшĕнче районти ветстанцире колхозсемпе производство кооперативĕсенчи зоотехниксемпе осеменаторсен вĕренĕвĕ иртнĕ. Ăна райадминистрацин ăратлăх енĕпе ĕçлекен зоотехникĕ А.В.Елизарова йĕркелесе ертсе пынă. Алевтина Викторовна пухăннисене районти выльăх-чĕрлĕх отраслĕн 11 уйăхри кăтартăвĕсемпе паллаштарнă, ĕнесенчен ытларах пăру илес ыйту çинче тĕплĕнрех чарăнса тăнă. Вăл пĕлтернĕ тăрăх, кашни 100 ĕне пуçне пăру илессипе «Свобода», «Коминтерн», «Нива» хуçалăхсенче аван ĕçленĕ, В.Никитин фермер хуçалăхĕн те кăтартăвĕсем япăхах мар,

Шел те, пĕр условисенчех «Путь Ильича», «Штанашский» ĕне фермисенчи осеменаторсем выльăхсене искусственнăй майпа пĕтĕлентерессипе, ăратлăха çĕнетсе пырассипе япăх ĕçлеççĕ. Çавна пулах юлашки вăхăтра вĕсенчен пăру илесси те япăх, сăвăм та чакса ларнă.

«Коминтерн» ЯХПК сысна ĕрчетессипе тупăшлă ĕçлесе пырать. Ăратлăха çĕнетес тĕлĕшпе кăçал сысна аçисем туяннă. Кунта кашни амаран çура илесси те аван. Иртнĕ çул 11 уйăхра 1595 çура илнĕ пулсан, кăçал çак кăтарту 1985-пе танлашать. «Путь Ильича» колхозра 2006 çулхи çак тапхăрта 800 çура илнĕ, кăçал 400 пуç çеç.

Осеменаторсен вĕренĕвĕнче ветстанци специалисчĕ Р.Д.Руль выльăхсене искусственнăй майпа пĕтĕлентерессин технологине çирĕп пăхăнса ĕçлемелли, ĕнесенчен пăру илессине ÿстермелли çинчен каланă, чылай сĕнÿсем панă.

Вĕренÿре практика пайĕ те пулнă.