Унпа килĕшÿллĕн, культурăпа спорт учрежденийĕсене çул çитмен ачасем, пенсионерсем, инвалидсем, сахал тупăшлă тата нумай ачаллă çемьесенчи ачасем, çар çыннисем, çар службинче тăракансем çăмăллăхлă правăпа усă курса çÿреме пултараççĕ. Асăннă йышăну 18 çул тултарман çамрăксене тата нумай ачаллă çемьесене республикăри музейсене уйăхра пĕрре тÿлевсĕр кĕме май пуррине шантарать. Çавна май, Чăваш Республикинчи хула-район администрацийĕсене культурăпа кану тата спорт организацийĕсенче тÿлевлĕ мероприятисем ирттернĕ чухне çÿлерех асăннă çăмăллăхсене палăртмалли йĕрке çинчен кирлĕ нормативлă право акчĕсене йышăнма сĕннĕ.

Палăртмалла, Чăваш Республикинчи патшалăх музейĕсене социаллă хÿтлĕхсĕр юлнă граждансен тÿлевсĕр çÿреме ирĕк пурри 2000 çулхи январĕн 1-мĕшĕнчен вăйра тăрать. Унпа килĕшÿллĕн, çул çитмен çамрăксем тата нумай ачаллă çемьесем кашни уйăхăн юлашки канмалли кунĕсенче музейсене тÿлевсĕр çÿреме пултараççĕ. Статистика кăтартнă тăрăх, 2006 çулта Чăваш наци музейне, А.Г.Николаев летчик-космонавтăн мемориалне 4000 çын çур хакпа кĕрсе курнă. Çÿрекенсен йышĕнче ытларах ачасем пулнă.