Вар-хырăм чирĕсенчен пĕри – лямблиоз. Вăл чирлĕ çынсемпе выльăхсем урлă сарăлать. 9 çула çитичченхи ачасем хушшинче лямблиозлисем, çитĕнсе çитĕннисемпе танлаштарсан, 2-3 хут ытларах. Çак чир çуман, хура алăсем урлă, апат-çимĕçпе, шывпа пĕрле лекет. Шăнасем, таракансем, тислĕк нăррисем – лямблие активлă саракансем. Гигиена правилисене пăхăнмасан ку чире хăвăртах çаклатма пулать. Ишмелли бассейнсем, пĕвесем, водопровод сечĕсем те хăрушлăх кăларса тăратма пултараççĕ.

Лямблиозлă ачасен пыршăлăхĕн лăймака сийĕпе хÿтĕлевĕ чакать. Çакна тума консервантсем, красительсем, тутă кĕртме янă хăш-пĕр япаласем (вĕсем япăх пахалăхлă апат-çимĕç йышне кĕреççĕ), çурма фабрикатсем, чипссем, промышленноç производстви кăларакан соуссем уйрăмах “пулăшаççĕ”.

Чир пуçланнă чухне пыршăлăх кÿпсе каять, варвитти тытăнать, пуç ыратать, ачан чĕрĕ виçи чакать, вăл часах ывăнать, аллерги чирĕсем палăраççĕ, хăстарать тата ытти те. Çак чир ан лектĕр тесен апат-çимĕç продукчĕсем, ĕçмелли шыв пахалăхлă пулмалла. Ачасене, акă, вĕретнĕ шыв кăна ĕçтермелле. Лямблиоза сарăлма чарас тĕллевпе ача-пăча учрежденийĕсенче комплекслă мероприятисем ирттереççĕ. Пепкесем ушкăна, вĕренекенсем класа пырсанах, каникул хыççăн эпидемиологи кăтартăвĕсем тăвас пулать. Профилактика тĕрĕслевĕсене воспитательсемпе вĕрентекенсем хушшинче те йĕркелемелле.

Ачасем – пирĕн пуласлăх. Вĕсен сывлăхĕшĕн тăрăшар.