Ноябрĕн 8-мĕшĕ тĕлне районти хуçалăхсенчи ĕнесем кашни кун вăтамран 6, 6 килограмм сĕт антарнă. Çав хушăрах «Коминтерн» ЯХПК-ри дояркăсем кашни ĕнерен талăкра 10 килограмм сĕт суса илеççĕ, комплексри кăтарту – 11, 3. Енчен та районти фермăсенче пурĕ 11 тоннăна яхăн сĕт суса илеççĕ пулсан, «Коминтерн» хуçалăх хăех 4 тонна çурă майлă продукци туса илет. «Свобода» колхозăн кăтартăвĕ – 9, 7 килограмм, «Нива» – 7, 6, «Победа» – 6, 8, «Мочковашский” – 6, 3, ыттисен районăн вăтам кăтартăвĕнчен пĕчĕкрех. В.Никитин фермер хуçалăхĕнчи ĕнесем талăкра 5, 4 килограмм сĕт антарнă, пĕлтĕр çак хушăра талăкри сăвăм вăтамран 7, 7 килогрампа танлашнă. Шел те, «Путь Ильича» колхозра кашни ĕнерен 3, 3 килограмм çеç сĕт суса илеççĕ. «Аккозинский» ЯХПК çинчен уйрăммăн каламалла. Иртнĕ çул кунти дояркăсем талăкра кашни ĕнерен 9, 2 килограмм продукци илнĕ пулсан, халĕ кунта сăвăм 4, 4 килограма çити чакса ларнă. Районти тĕп зоотехник пĕлтернĕ тăрăх, асăннă хуçалăхра специалистсем çитмеççĕ, фермăра сантехник ĕçĕсене пурнăçлакан çук. Пĕр йывăрлăх темиçе ĕç çине витĕм кÿнĕренех пулĕ хуçалăх йывăрлăхра.

Ĕнесенчен пăру илессипе те мухтанмаллиех çук. Кăçал пĕлтĕрхинчен 172 пуç таран сахалрах илнĕ. Çакă ял хуçалăхĕсенче ĕнесен шутне чылай чакарнипе çыхăннă. Хăш-пĕр фермăсенче осеменаторсем çукки те ĕçре йывăрлăх кăларса тăратать.