Историнче 1917 çулхи январь уйăхĕнче Хĕрлĕ Чутай салинче Илья Павлович Храмов пуçарнипе потребитель обществин пуçламăшĕ палăрать. 1927 çулта вара районти потребитель обществин союзĕ йĕркеленнĕ. Унăн председателĕ пулма Виссарион Андреевич Триковскине шаннă.

1940 çулччен Тури Çĕрпÿкасси, Штанаш, Кив Ирчемес, Хĕрлĕ Чутай тата Шĕмшеш ялĕсенче йывăçран пысăк мар лавккасем уçăлаççĕ.

1943-1947 çулсенче Пчелка тата Ачкасси ялĕсенче çĕнĕ лавккасем хута каяççĕ. 1940-1947 çулсенче председатель пулса С.Ф., С.С.Фондеркин, М.Н.Беляков, Г.Л.Максеев ĕçленĕ.

1950 çулсенче çеç потребкоопераци вăй илме пуçлать. Атнар, Сорăм, Вишенер, Чурпай, Енкĕлт, Березовка, Урикасси, Серенкасси, Кÿпеш, II Липовка, Çĕн Атикасси, Хурапыр, Вырăсушкăнь, Мăн Этмен, Упукушкăнь, Арайкасси ялĕсенче, СХТ территорийĕнче, Хĕрлĕ Чутайра (“Пулă” лавкка”), йывăçран тунă лавккасем хута каяççĕ. 1963-1967 çулсенче Туканаш, Турхан, Ишеккасси, Мишеркасси, Кив Атикасси, I Хурашаш ялĕсенче лавккасем уçăлаççĕ. Вăл вăхăтра председатель пулса Ф.Л.Горбунов, Ф.Г.Чернов, И.П.Ордяков, М.Г.Власов, П.И.Иванов ĕçленĕ, 1963-1967 çулсенче – Ф.А.Богатнаев. 1968 çултан пуçласа 1987 çулччен М.П.Чикирин райпо председателĕ пулса ĕçленĕ. Ку вăхăтра вара райпо системине чылай çĕнĕлĕх кĕнĕ: район центрĕнче универмаг, гастроном, сĕтел-пукан тата çăкăр магазинĕсем, Хĕрлĕ Çырта (Красный Яр), Питĕркассинче, Туктамăшра, Шулюра, Ваçкаçырминче, I Липовкăра, Хирлÿкассинче, Хватукассинче, Атнарта, Ачкассинче, Штанашра, Тихăнушкăнĕнче, Сĕнтĕкçырминче, Хусанушкăнĕнче, Анат Çĕрпÿкассинче, Кĕрлевре, Яманкассинче, Мăн Этменте лавккасем уçăлаççĕ, Хĕрлĕ Чутайра тата Кив Атикассинче çăкăр завочĕсем хута каяççĕ.

Ĕçне кура – хисепĕ. Вăл вăхăтра Хисеп орденне – А.П. Мырочкина кондитер (1974 ç.), М.П.Хорайкина сутуçă (1976ç.), В.А.Алексеев сутуçă (1981ç.), Ĕç мухтавĕн орденне – Карăкçырми ялĕн сутуçисем А.А.Михеевпа (1971ç.) С.С.Михеева (1986 ç.), «Ĕçри хастарлăхшăн» медале Ю.П. Михуткина экспедитор тивĕçнĕ.

1987 çулхи февраль уйăхĕнчен пуçласа 1988 çулхи январь уйăхĕччен райпо председателĕ пулса И.Л.Хораськин тăрăшнă. Çав вăхăтра паянхи кун эпир çÿрекен Урикасси, Енкĕлт, Пчелка, Кĕрлев, Березовка магазинĕсем тата «Стройхозтовары» лавкка хута кайнă.

1988 çулхи октябрь уйăхĕнчен пуçласа 1997 çулхи январь уйăхĕччен райпона В.С.Кузьмин ертсе пынă. Ку тапхăрта райпон техника бази çĕнелсе улшăнать, çавăн пекех утар тата çĕвĕ цехĕ хута каять.

1997 çултан пуçласа паянхи кунчченех райпона А.Ю. Степанов ертсе пырать.

Уявра район пуçлăхĕ А.И.Криков тÿрĕ кăмăлтан нумай çул ĕçленĕшĕн Пухтанкасси ялĕн сутуçине Альбина Александровна Падейкинана, I Липовка ялĕн сутуçине Владимир Иванович Храмова тата правлени председателĕн çумне Евгений Викторович Соловьева Хисеп грамоти парса чысларĕ, района 80 çул çитнине халалласа иртнĕ уява хатĕрленнĕ чух чылай ĕç тунăшăн райпо ĕçченĕсене А.Ю.Степановпа Г.И.Ярлова, З.М.Самылкинапа Г.Г.Жижайкинана Тав çырăвĕ парса чысларĕ.

РФ Центросоюзăн орденĕсене райпо Канашĕн председателĕ Александр Юрьевич Степанов тата Ольга Илларионовна Ербулаткина, Анна Ивановна Патьянова, Александр Иванович Самылкин, Юрий Николаевич Ягункин, Лидия Андреевна Ядаринкина ветерансем тивĕçрĕç.