Кĕçнерни кун, сентябрĕн 27-мĕшĕнче районта Раççей Федерацийĕн Патшалăх Думин депутачĕн П.Семеновăн пулăшуçи Ю.Н.Григорьевский пулчĕ.

Чи малтанах Юрий Никонович Хĕрлĕ Чутай ял тăрăхĕнче пурăнакансемпе тĕл пулма шут тытрĕ. Вăл ял çыннисене пăшăрхантаракан ыйтусемпе йышăнчĕ. Кашни çыннăн хăйĕн нуши çав. Акă, Туктамăш ялĕнче пурăнакан ĕç ветеранĕ, II ушкăн инваличĕ А.К.Гордеев соцпакет пирки сăмах пуçарчĕ. Вăл кăçалхи çул валли çак социаллă çăмăллăхсен пуххине хирĕçлемен пулнă, анчах çăмăллăхĕсемпе те усă курайман, тÿлевсĕр эмелне те пĕрре çеç илме пултарнă. 2008 çул валли А.К.Гордеев соцпакета хирĕçленĕ те ĕнтĕ. Хĕрлĕ Чутай салинчи Советски урамĕнче пурăнакан А.М.Столярова çемьене тăрантаракан вилнипе паракан укçа тÿлевĕ хăçан ÿсессипе интересленчĕ. Хĕрлĕ Чутай салинчи Çĕнĕ урамра 19 çуртра пурăнакан Г.В.Малышевана урамра çуртсем çывăхĕнче туалет çукки пăшăрхантарать. Ишеккассинчи Л.Н.Васькова хваттер илме тăнă черете ачасем çине еплерех куçармалли йĕркепе интересленчĕ. Çак ялтах ĕçлесе пурăнакан О.И.Долгова шкулта шыв çукки çинчен тата клуб патне çул кирли пирки сăмах хускатрĕ. Туктамăш ялĕнче ĕçлесе пурăнакан Л.А.Деведерова тата А.П. Яковлева культура отрасльне тимлĕх сахал уйăрни çинчен калаçрĕç. Вĕсем культура ĕçченĕсене нумай ĕçленĕ çулсемшĕн тÿлеменни пирки пăшăрханаççĕ. Любовь Андреевна библиотекăра литература çителĕксĕррине те асăнчĕ. Хĕрлĕ Чутай салин Красноармейски урамĕнче пурăнакан А.И.Бродюкова ĕç ветеранĕ пенси укçи 40 çул колхозра тимленĕ пулин те пĕчĕк пулнине палăртрĕ. Чăн та, колхоз ĕçĕнче пиçĕхнисен пенси чи пĕчĕкки ĕнтĕ. Волгоградра 3 çул ĕçлени те çак кинемейĕн пенсине хăпартма пулăшайман. Юрий Никонович кун пек чухне 5 çул ĕçленине çеç шута илнине ăнлантарчĕ.

Унтан Ю.Н.Григорьевский Питĕркасси тата Атнар ял тăрăхĕсенче пурăнакансене йышăнчĕ, пур ыйтăва та уйăх хушшинче пăхса тухса çырупа хуравлама шантарчĕ.