Туктамăш ялĕнче пурăнакан ватăсем ялăн обществăлла пурнăçĕнче яланах активлăх кăтартаççĕ. Ялти клубра мероприяти иртсен вĕсем çут çанталăкăн хуть те хăш вăхăтĕнче те унта хутшăнма хавас. Акă, тунти кун ялти тĕслĕх библиотека заведующийĕ Л.А.Деведерова тата клуб директорĕ А.П.Яковлева Ватă çынсен кунне халалласа «Иртеççĕ кунсем, иртеççĕ çулсем» каç йĕркеленĕ. Кинемейсемпе мучисем вăхăт тупса хаваспах ял библиотекине пухăннă.

Любовь Андреевна чи малтанах вĕсене аслă ăру çыннисем çинчен хайланă сăвăсем вуласа панă, унтан ватăсене юрăсем итлеттернĕ. «Ĕмĕр иртет, кун юлать» кĕнекесен куравĕ те пулнă уявра. Каярахпа, пурте сĕтел хушшине ларсан, конкурссем иртнĕ. Ĕлĕкхи юрăсене шăрантарассипе 80 çултан иртнĕ А.Петровапа Е.Палейкина ăста пулнă. Вĕсене тантăшĕ В.Черендеев та пулăшса пынă. Хальхи юрăсене юрлас конкурсра Н.Палейкина тата Л.Магаськина палăрнă. П.Удяковпа М.Тихонова, Н.Тагайкина ташлас енĕпе пултарулăх кăтартнă. Уяв сĕтелĕ тулăх пултăр тесе тăрăшма та манман кинемейсем. М.Тихонова тутлă кукăльсем, З.Сатлайкина пĕремĕксем пĕçерсе килнĕ, Н.Удяковапа Н.Черендеева салатсем хатĕрленĕ, ыттисем те техĕмлĕ апат-çимĕç илсе килнĕ.

Уяв ячĕпе Хĕрлĕ Чутай ял тăрăхĕ ватăсене парне тунине асăнмасăр иртме çук. Ял тăрăхĕнче тимлекен Н.Ульянова уяв ячĕпе саламласа пухăннă кинемейсене тутăр, мучисене нуски парнеленĕ. Ватăсем хăйсене тимлĕх уйăрнăшăн çав тери кăмăллă юлнă.

Туктамăшра вăй хуракан культура ĕçченĕсем пĕр мероприяти ирттернипех лăпланса лармаççĕ, вĕсен малашлăх тĕллевĕсем те çук мар. Çитес вăхăтра Л.Деведерова тата А.Яковлева «Чăмăрла улма уявĕ», унтан ваттисем валли тата çамрăксем валли уйрăммăн Кĕрхи балсем ирттересшĕн.