Тунти кун, йăлана кĕнĕ тăрăх, район пуçлăхĕн пÿлĕмĕнче ир-ирех планерка иртрĕ. Унăн ĕçне райадминистраци ертÿçин çумĕсем, пайсен тата уйрăмсен начальникĕсем тата ыттисем те хутшăнчĕç.

Планеркăна пуçланă май, А.И.Криков ку хутĕнче унăн теми çывхарса килекен юбилейсене хатĕрленес тĕлĕшпе район территорийĕнче тирпейлес ĕç епле шайра пынипе çыхăннине пĕлтерчĕ. Чи малтанах Александр Иванович Хĕрлĕ Чутай салине 425 çул çитнине уявлама хатĕрленессипе ял тăрăхĕ мĕнлерех ĕçсем пурнăçланипе интересленчĕ. Ял тăрăхĕн пуçлăхĕ В.К.Романов территорисене çÿп-çапран тасатассипе, курăксене çулассипе тимленине каларĕ. Çавăн пекех хăш-пĕр ял çыннисем хăйсен çурчĕсен умĕсене тирпейлеме ыйтсан та ку ĕçе пурнăçламаннине, кам та пулин килсе туса парасса шанса ларнине пăшăрханса каласа пачĕ, анчах та халăхпа ăнлантару ĕçĕ малалла пынине пĕлтерчĕ. Унтан В.К.Романов мĕнле ĕçсем пурнăçлани çинче чарăнса тăчĕ. Ун хыççăн район пуçлăхĕн çумĕсем А.П.Самылкин тата И.Л.Хораськин Хĕрлĕ Чутай ял тăрăхĕн  уйрăмах Ленин тата Советски урамĕсем тасамарлăх енчен палăрса тăни пирки çирĕплетрĕç, халăхпа калаçса татăлса çак çитменлĕхсене эрне хушшинче пĕтерме хушрĕç, каласан та пурнăçламаннисене административлă майпа явап тыттармалла терĕç.

Коммуналлă хуçалăх директорĕ А.Г.Алексеев район  центрĕнче чечексем лартнине тата курăк çулса тăнине, хваттерлĕ çуртсем умне валли саксем хатĕрленине, 20 контейнер туяннине, 200 тонна хура тăпра тиесе килнине пĕлтерчĕ. Александр Георгиевич уявсене хатĕрленес ĕçсем малалла пынине каларĕ. А.И.Криков вара чи малтанах тасалăх тата тирпейлĕх енĕпе коммуналлă хуçалăхăн хăйĕн тĕслĕх кăтартмаллине, территоринчи çÿллĕ курăксене çулмаллине асăрхаттарчĕ.

Район больницин тĕп врачĕ И.М.Сидоров та сăмах илчĕ, тирпей-илем тĕлĕшпе мĕн ĕçленине каласа пачĕ. Игорь Михайлович райбольница çуртне каçхи вăхăтра çутатса тăрассине йĕркелеме укçа-тенкĕ кирлине каларĕ. Район пуçлăхĕ А.И.Криков районти тĕп больницăн та  тасалăх енĕпе ырă тĕслĕх кăтартмаллине палăртрĕ, анчах ку енĕпе хальлĕхе районти сывлăх учрежденийĕ палăрса тăманнине пĕлтерчĕ. Александр Иванович райбольница территорийĕнче августăн 1-мĕшĕччен йĕрке тума ыйтрĕ.

Ял тăрăхĕсем хушшинчи культурăпа кану центрĕн директорĕ А.И.Магаськин вара культура çурчĕ çумĕнче эрешлĕ тимĕр карта тытни пирки каларĕ. Алексей Иванович культурăпа кану центрне каçхине çутатса тăрассине йĕркелессипе йывăрлăхсем пуррине пĕлтерчĕ. Çавăн пекех вăл çуртра вырнаçнă учрежденисен ĕçченĕсем тирпей-илем кĕртес ĕçе явăçманни çинчен асăнчĕ. А.И.Магаськин августăн 18-мĕшĕнче иртекен мероприятисене коллектив активлă хутшăнасса çирĕплетрĕ.

Унтан уявсем çитиччен епле çулсем хута кайма пултарасси пирки сăмах пычĕ. Райадминистрацин обществăлла инфратытăм аталанăвĕн тата çурт-йĕрпе коммуналлă хуçалăх ыйтăвĕсемпе ĕçлекен пайĕн начальникĕн çумĕ, çул-йĕр секторĕн заведующийĕ В.Н.Романов юбилейсем тĕлне Чурпай тата Кушлавăш ял çыннисем валли çул хатĕр пулассине пĕлтерчĕ. Çавăн пекех Валентин Николаевич Хĕрлĕ Чутай салинче тротуар туса пĕтермеллине асăнчĕ. Подрядчиксене çул хĕрринче тирпейлесе тăрас ĕçе явăçтарасси пирки те калаçу пычĕ. Çавăн пекех  А.П.Самылкин çул-йĕр паллисене çителĕксĕр лартса тухни пирки, вĕсем кирлĕ вырăнсенче çукки çинчен каларĕ.

Планеркăна пĕтĕмлетнĕ май, А.И.Криков эрне хушшинче пур предприятисенче те уява хатĕрленес тĕлĕшпе çитменлĕхсене пĕтерме хушрĕ. Тирпей-илем кĕртесси, тасамарлăхпа кĕрешесси уявсем çитнипе кăна мар, кулленех пулса пымаллине палăртрĕ. Юлашкинчен йĕрке тума темиçе хут каласан та вырăнтан тапранман ертÿçĕсене административлă майпа явап тыттарма тивнине асăнса хăварчĕç.