Кĕçнерни кун, июлĕн 19-мĕшĕнче, райадминистрацин ларусем ирттермелли Пысăк залĕнче район депутачĕсен Пухăвĕн “Чăваш Республикин Хĕрлĕ Чутай районĕн Уставне улшăнусем кĕртесси çинчен” йышăнăвĕн проектне халăхпа пăхса тухса сÿтсе яврĕç. Унта райадминистрацин тĕрлĕ уйрăмĕсенче тимлекен специалистсем тата ыттисем хутшăнчĕç.

Чи малтанах район пуçлăхĕн пĕрремĕш çумĕ, райадминистрацин ял хуçалăхпа экономика, пурлăх тата çĕр хутшăнăвĕсен управленийĕн начальникĕ А.П.Самылкин сăмах илчĕ. Александр Петрович пухăннисене çак проекта сÿтсе явмаллине, ун хыççăн район депутачĕсен Пухăвне пăхса тухма памаллине палăртрĕ. Унтан райадминистрацин юрисчĕ  А.В.Михеева калаçрĕ. Алина Владимировна вырăнти хăй тытăмлăха йĕркелессин пĕтĕмĕшле принципĕсем çинчен тата муниципаллă служба пирки калакан федераллă саккунсене улшăнусем кĕртнипе район Уставĕнче те улшăнусем пулмаллине çирĕплетрĕ. А.В.Михеева пурĕ Устава 10 улшăну кĕртмеллине пĕлтерчĕ, унтан кашнипе тĕплĕн паллаштарчĕ. Пухăннисем проекта ырларĕç, район депутачĕсене çитес Пухăвăн ларăвĕнче пăхса тухма сĕнме йышăнчĕç.