Кăçалхи апрелĕн 20-мĕшĕнче ЧР Президенчĕ ĕç ветеранĕсене социаллă пулăшу парас, вĕсен йĕркеллĕ пурнăç шайне, обществăри хисепĕпе ят-сумне тивĕçтерес тĕллевпе “Чăваш Республикин ĕç ветеранĕ” ят туса хурассипе Указ йышăннă. Июнĕн 13-мĕшĕнче вара ЧР Министрсен Кабинечĕ “ЧР ĕç ветеранĕ” ята памалли йĕркесемпе условисене çирĕплетесси тата удостоверенипе тивĕçтересси çинчен” йышăну кăларнă. Вăл июнĕн 24-мĕшĕнчен вăя кĕчĕ.

“ЧР ĕç ветеранĕ” ята илме ирĕк пур граждансен районти социаллă хÿтлĕх пайне килсе заявлени çырмалла. Заявленипе пĕрлех çак ята тивĕçме пултарнине çирĕплетекен документсен, пенси удостоверенийĕн, паспортăн (2, 3-мĕш тата ăçта пурăннине çирĕплетнĕ паллăллă страницăсем) копийĕсем, 3 х 4 виçеллĕ пĕр сăн ÿкерчĕк тăратмалла.

Республика тулашĕнче пурăнакан çынсен заявление Шупашкар хулинчи халăха социаллă хÿтлĕхпе тивĕçтерекен Управление тăратмалла.

Халиччен районта “ЧР ĕç ветеранĕ” ята илме виççĕн заявлени панине палăртмалла: В.С.Кузьмин, Л.И.Наштыкова, Н.В.Прокопьева. ЧР ĕç ветеранĕсен ытти ĕç ветеранĕсен пекех пĕр пек çăмăллăхсем пур. Ку - уйăхсерен 315 тенкĕпе танлашакан укçа тÿлевĕ, çурт-йĕрпе коммуналлă пулăшусемшĕн тата телефонпа, радиопа усă курнăшăн çур хак çеç тÿлесси.