Апрелĕн 21-мĕшĕнче районти çăмăл атлетсем республикăри Красноармейски салинче иртнĕ çуркуннехи кроса хутшăннă.

Çамрăк спортсменсем хушшинче Наташа Герасимовапа (Хĕрлĕ Чутай сали, ял хуçалăх академийĕн студенчĕ) Атнар шкулĕнче ăс пухакан Мария Гусева лайăх кăтартусемпе палăрнă. Хĕрарăмсен тупăшăвĕнче, вĕсем 3 километрлă дистанцие чупнă, Хĕрлĕ Чутай гимназийĕн физкультура учителĕ Г.А. Мидейкина республикăра 2-мĕш вырăн çĕнсе илнĕ, спорт шкулĕн тренерĕ Л.А. Михуткина - пĕрремĕш.

Футбол

Иртнĕ канмалли кунсенче районти футбол ăстисем Чул хула облаçĕнчи Воротынец хулинчи юлташла тĕл пулăва хутшăннă. Палăртмалла, хĕрлĕчутайсемшĕн тупăшу çăмăл килмен, вăйă кил хуçисем çĕнтернипе вĕçленнĕ.

Шахмат

Вырсарни кун спорт шкулне шахматла выляма кăмăллакансем пуçтарăннă. Вĕсем Питĕркассинчи Николай Сергеевăн парнине çĕнсе илессишĕн тупăшнă. Хĕрсен ушкăнĕнчен пултарулăхпа Шулюри Н.Рябикова палăрнă, арçынсенчен - А.Альгешкин (Туктамăш).

Аса илтеретпĕр, апрелĕн 27-мĕшĕнче районти спорт шкулĕнче кире пуканĕ йăтассипе Хĕрлĕ Чутай райадминистрацин пуçлăхĕн призне çĕнсе илессишĕн республикăри турнир иртмелле.