Хÿтлĕхсĕр тăрса юлнипе, çемье ăшшине ачисем пур çĕртех çухатнипе е урăх сăлтавпа Ваттисен çуртне çул тытнă  кинемейсемпе мучисене унта тимлекен социаллă ĕçченсем канлĕ ватлăхпа тивĕçтерессишĕн, шанăçне тата ĕненĕвне çухатнăскерсене пулăшассишĕн, ватăсен пурнăçне савăкрах та кăшт та пулин çăмăлрах тăвассишĕн вăй-халне шеллемеççĕ. Социаллă сферăра тăрăшакансен ĕçĕ çăмăл теме çук. Шăпах вĕсем хушшинче хăйсен ĕçне чунтан парăннисене, чи лайăххисемпе пултаруллисене тупса палăртас тĕллевпе апрелĕн 19-мĕшĕнче Березовкăри Ваттисен çуртĕнче «Професси енчен чи лайăххи» ятпа конкурс иртрĕ. Калас пулать, ăна Ача çулталăкне халалланă. ЧР Сывлăх сыхлавĕн тата социаллă аталану министерствин халăха социаллă пулăшу паракан районти центрĕ йĕркеленĕ конкурса хутшăнма пурĕ 6 социаллă ĕçчен кăмăл тунă. Вĕсем: Атнарти Ваттисен çуртĕнче тимлекен А.В.Степанова, Н.И.Абаськина тата Березовкăри ватăсене пăхакан Р.А.Ярасовапа Л.С.Федорова, пĕчченех килте пурăнакана пăхса тăракан З.Н.Элеменкина.

Чи малтанах пухăннисем умĕнче районти халăха социаллă ыйтусемпе тивĕçтерекен пайĕн начальникĕ В.И.Ярабаева сăмах илчĕ, социаллă ĕçченсен психолог та, педагог та пулма тивнине асăнчĕ, вĕсене пархатарлă та ырă ĕçĕшĕн тав турĕ, конкурса хутшăнакансене ăнăçу сунчĕ.

Программăпа тата жюри членĕсемпе центр ĕçĕсене вăхăтлăх йĕркелесе пыракан С.Н.Орлова паллаштарчĕ. Конкурса О.Е.Альгешкина центр ĕçченĕ ертсе пычĕ.

Пĕрремĕш конкурсра социаллă ĕçченсем хăйсем çинчен хăшĕ сăвăласа, хăшĕ юрласа е каласа пачĕç. Унтан конкурсантсем социаллă пулăшупа тивĕçтермелли мерăсене, тĕрлĕ право докуменчĕсене,  вăхăтра васкавлă пулăшу пама пĕлнине тĕрлĕ ыйтусем çине хуравласа кăтартса пачĕç. Кунта пур ыйтăва та  З. Элеменкина, Р.Ярасова, Н.Трофимова тата А. Степанова тĕрĕс хуравлама пултарчĕç. «Пĕлетĕп, тума пĕлетĕп, вĕрентĕп..!» конкурса сăнама питĕ интереслĕ пулчĕ. Кунта ал ĕçĕсемпе паллашма тÿр килчĕ. Акă, А.Степанова хитре нуски çыхса килнипе асра юлчĕ. Н.Абаськина илемлĕ ал шăлли тĕрленĕ. З.Элеменкина пластик кĕленчерен чечексем ăсталанă. Ыттисем те çыхас ăсталăхĕпе палăрчĕç. «Тутлă историсем» конкурса та тĕплĕн хатĕрленнĕ социаллă ĕçченсем. Пĕри тĕлĕнмелле салат тунă, тепри пылак торт пĕçернĕ, виççĕмĕшĕ кăпăшка кукăль-пицца илсе килнĕ. Пĕр сăмахпа каласан, апат-çимĕç хатĕрлессипе пурте маттур.

Чăваш Республикин кунне халалланă «Чап патне картлашка» конкурсра вара кашни е кинемейпе, е мучипе юрласа-ташласа хăйĕн талантне кăтартрĕ. Атнарти Ваттисен çуртĕнче пурăнакансем хăйсене чун ăшши парнелекен ĕçченсене юрласа пулăшса хавхалантарчĕç. Тĕрлĕ ситуацирен епле тухма пултарнине тĕрĕслес конкурсра З.Элеменкина, Р.Ярасова хăйсен тулли те кăткăс хуравĕсемпе палăрчĕç.

Палăртмалла, жюри членĕсем конкурссем хыççăн  пĕтĕмлетÿсем хатĕрленĕ чухне куракансем Ваттисен çурчĕсенче канлĕх тупнă З.Чеблукова, М.Ембулаткина, М.Колбасова, П.Васюкова шăрантарнă юрăсене итлесе киленчĕç. Атнарти Ваттисен çурчĕн ертÿçи Е. Степанова тата центр ĕçченĕ Р.Орлова та юрă парнелерĕç. Юрă тăхтавĕсем пуррипе никама та кичем пулмарĕ.

Çапла вара тĕрлĕ конкурссенче тупăшса, чи нумай балл пухса малти вырăна Анастасия Степанова тухма пултарчĕ. Вăл утюга тивĕçрĕ. Кăшт виçĕ балл сахалрах пулнипе иккĕмĕш вырăнта Зоя Элеменкина пулчĕ. Ăна вара термос парнелерĕç. Виççĕмĕш вырăна Роза Ярасова тухрĕ, ăна çăкăр хумалли савăт пачĕç. Жюрире ларакансемпе конкурса хутшăннă ытти социаллă ĕçченсене те, юрă тăхтавĕсенче палăрнă ватăсене те парнесемсĕр хăвармарĕç центр ĕçченĕсем.

Атнарти тата Березовкăри Ваттисен çурчĕсенче канлĕх тупнă кинемейсемпе мучисен çак кун пĕр-пĕринпе калаçса чунĕсене уçма, ташă-юрăпа савăнма, уяв сĕтелĕ хушшинче хăналанма май пулчĕ. Вĕсем те тимлĕхсĕр юлманшăн çав тери савăнчĕç.