Апрелĕн 21-мĕшĕнче районти культурăпа кану центрне «Чутай пики - 2007» конкурса хутшăнма ял тăрăхĕсенчи 5 хĕр упраç килсе çитрĕ.

Вĕрентÿпе социаллă аталану пайĕсем, ял тăрăхĕсем хушшинчи культурăпа кану центрĕ тăван халăх йăлине анлă сарас тата пултаруллă пикесене тупса палăртас, вĕсене хавхалантарас тĕл­левпе йĕркеленĕ уяв-хаклав аван иртрĕ, куракан та йышлă пухăнчĕ.

Культурăпа кану центрĕн илемлĕх ертÿçи Ольга Сергеева уява уçнă май, пикесене хăйсемпе паллаштарма сцена çине тухма ыйтрĕ. Вĕсем: Кристина Кудряшова (Серенкасси, 12 çулта), Надежда Аксакова (Кив Атикасси, 12 çулта), Олеся Скворцова (Турхан, 13 çулта), Анжела Яруткина (Штанаш, 14 çулта), Валентина Улянды (Хĕрлĕ Чутай, 14 çулта).

Чутай пикисен 5 конкурс витĕр тухмалла, хăйсен пултарулăхне пур енлĕн уçса памалла пулчĕ.

Паллашу конкурсĕнче кашни хĕр пĕрчи хăй ăçта çуралнине, мĕнпе кăсăкланнине, ĕмĕт-тĕллевне пĕлтерчĕ.

Конкурса кашниех тĕплĕн хатĕрленнĕ. Акă, «Манăçми сăнар» темăра Н.Аксакова «Нарспи» поэмăна пултаруллăн вуларĕ, В.Улянды «Снежная королева» юмаха сăнарлани куракансен кăмăлне кайрĕ, ытти хĕр упраçсен те пултарулăхĕ иксĕлми.

«Ăстаçă» конкурсра кашни ĕçчен пулни палăрчĕ.

«Пуласчĕ манăн çăлтăр» конкурса халăх тулли кăмăлпа йышăнчĕ. Хĕрсем пĕрин хыççăн тепри илемлĕ юрă шăрантар­чĕç, кăмăла çĕк­лерĕç. Штанашри А.Яруткинапа Кив Атикассинчен килнĕ Н.Аксакова, Турхан ялĕн пики О.Скворцова чăваш юррисене артистсенчен пĕрре те кая мар янăратрĕç, куракансене кичемленме памарĕç. В. Улянды фортепиано калама пĕлнипе палăрчĕ, Серенкассинчи хĕр пĕрчи хальхи ташăсене ташлама ăста иккен.

«Çуллахи мода» конкурсра сцена çине чылай хĕр упраç тухрĕ. Вĕсем кăçал çулла тăхăнмалли меллĕ те илемлĕ çи-пуç кăтартрĕç. Хĕрлĕ Чутайри В.Улянды хăйне хавхалантарса та пулăшса пыракан ушкăн çуллахи модăпа килсе çитнине пĕлтерчĕ, кашни çи-пуçа сăнласа пачĕ. Ыттисем, вăтаннипе-ши, модăпа сцена çине тухнă хĕрсен çи-пуçне ăнлантарса, уçса памарĕç.

Конкурсантсем хатĕрленнĕ самантсенче юрă тăхтавĕ пулса пычĕ.

Конкурс вĕçленсе пынă май, жюри членĕсене чи тивĕçлине суйлама çăмăл пулмарĕ. Çапах та, тĕплĕн пĕтĕмлетÿ тунă хыççăн, чи нумай балл пухса Хĕрлĕ Чутайри Валентина Улянды «Чутай пики - 2007» конкурсăн çĕнтерÿçи пулса тăчĕ, Хисеп грамотипе парнесене тивĕçрĕ. Ăна иртнĕ çулхи конкурс çĕнтерÿçи Вероника Волкова (Атнар ялĕ) саламларĕ, ăнăçу сунчĕ.

Конкурса хутшăннă ытти пикесене те активлăх кăтартнăшăн Хисеп грамотисемпе парнесем парса хавхалантарчĕç.

Уява ирттерме «Билайн» компани, С.Н.Федорова, Р.А.Егорова, А.М. Никитин, Е.И.Мидейкина, культурăпа кану центрĕ спонсорла пулăшу панă.

Асăнса хăварас килет, «Чутай пики» конкурса пур ял тăрăхĕнчен те хутшăнман. Е унти ялсенче хитре, пултаруллă хĕр пикесем çуралман-ши; Яш ĕмĕр пĕрре килет, асăнмалăх вăйă-кулă, паллă самантсем хăварасчĕ. Çитес çул конкурсантсен йышĕ ÿсессе шанас килет.