Социаллă пурнăçпа экономика аталанăвĕ производство мĕнле шайра пулнинчен нумай килет. Район тăрăх илсен, ку енĕпе пирĕн мухтанмалли сахалрах. Çапах та района ертсе пыракансем экономикăна çĕклес, пурнăç шайне лайăхлатас тĕлĕшпе пĕрмаях ĕçлеççĕ, приоритетлă программăсене пурнăçлас ĕçе хастар  хутшăнаççĕ.

Акă, Туканашри чăх-чĕп фабрикинех илер. Хăй вăхăтĕнче кунта пин-пин кайăк-кĕшĕк ĕрченĕ, аш-пăш, çăмарта туса илнĕ. 2000 çулта вара производство пачах чарăннă. Кăçал çак ĕçе тепĕр хут пуçарса ярасшăн, производствăна çĕклесшĕн. Ку енĕпе вырăнта реконструкци ĕçĕсем пуçланнă ĕнтĕ. Çак кунсенче район пуçлăхĕ А.И.Криков Туканаша çитрĕ, унти ĕç-хĕлпе, фабрикăн проекчĕпе тĕплĕнрех паллашрĕ, специалистсемпе курнăçрĕ. Палăртмалла, Туканашри чăх-чĕп фабрикинчи мĕн пур ĕçе Н.И.Лисаева шаннă, генеральнăй директорĕ Урикасси (Сосново) çынни Д.Н.Иванов.

Тĕпрен илсен кунта ĕçлемелли чылай. Хальлĕхе штатри ĕçченсем (пурĕ 24 çын) цехсене шăлса тасатас, çурт-йĕр стенисене çирĕплетес, тулаш енче тирпей-илем кÿрес тĕлĕшпе тимлеççĕ, унсăр пуçне строительсен бригади, электриксем ĕçлеççĕ.

Николай Иванович пĕлтернĕ тăрăх, фабрикăра тăватă цех ĕçлемелле, ун валли укçа çителĕклĕ хывнă. Çак кĕске вăхăтра пĕр цехне хута ярасшăн, бройлерсем илсе килме шутлаççĕ. Малашлăхра кунта кăвакалсем те ĕрчетесшĕн.

- Туканашри “Дар-Бройлер” чăх-чĕп фабрикине хута яратпăрах, халăх валли ĕç вырăнĕ те пулать, экономикăна кăштах та пулин çĕклетпĕр, ку енĕпе пирĕн малашлăх планĕсем пысăк, - терĕ Н.И.Лисаев.