Райхаçатăн иртнĕ кăларăмĕнче кăна çитес çулта “Единая Россия” парти пуçарнипе пĕтĕм çĕршыври кĕçĕн класс ачисене сĕтпе тивĕçтересси пирки асăннăччĕ. Шăпах çак енĕпе ĕнтĕ апрелĕн 1-мĕшĕччен ятарлă акци иртнĕ.

“Шкул сĕчĕ” проекта вырăнти тата партин пуçламăш уйрăмĕсенче, шкулсенче, ачасен ашшĕ-амăшĕсемпе учительсем хушшинче те анлăн сÿтсе явнă, çак проекта ырласа алă пуснă. Калас пулать, “Единая Россия” партин районти вырăнти уйрăмĕн ертÿçи Т.П.Захарова пĕлтернĕ тăрăх, ку енĕпе пурĕ 250 çын алă пуснă. Уйрăмах Хусанушкăнь, Хурашаш, Атнар шкулĕсенче тăрăшакан педагогсем активлă пулнине палăртмалла. Çавăн пекех Шулю, Мăн Этмен, Серенкасси, Тури Çĕрпÿкасси шкулĕсен учителĕсем тата “Пилеш” ача сачĕн ĕçченĕсем хастар пулнă. Хĕрлĕ Чутай гимназийĕнче ăс пухакан ачасен ашшĕ-амăшĕсем те активлăх кăтартнине асăнмалла.

Палăртмалла, “Единая Россия” партин пурнăçламалли тĕллевĕсем чылай. Акă, партин Чăваш Енри уйрăмĕ кăçалхи мартăн 30-мĕшĕнчен тытăнса апрелĕн 30-мĕшĕччен юр ирĕлнĕ хыççăн çиеле тухнă çÿп-çапран территорисене, урамсене, парксемпе скверсене тасатас та тирпейлес тĕллевпе, ачасен вылямалли вырăнĕсене тата спорт площадкисене юсас тĕлĕш­пе, йывăçсем лартас тĕллевпе уйăхлăх ирттерме палăртнă.