Мартăн 30-мĕшĕнче Культура керменĕнче районтан тухнă паллă юрăçсене Иван Охливанкинпа Григорий Петрова халалланă иккĕмĕш фестиваль пулнă. Фестивале ирттерме Шупашкартан Культура институчĕн профессорĕ, вокал уйрăмĕн заведующийĕ С.Кондратьев, Чăваш патшалăх педуниверситечĕн профессорĕ Ю.Дмитриева, Чăваш патшалăх университечĕн доценчĕ З.Яковлева килсе çитнĕ.

Фестивале хутшăнакан юрăçсене, çулĕсене кура, виçĕ ушкăна уйăрнă: 8-12 çулхисем, 13-17 тата 18-22 çулхи çамрăксем.  Конкурса икĕ номинаципе ирттернĕ: халăх тата эстрада юррисем.

Район администрацийĕн пуçлăхĕ В.Орлов тата районти культура управленийĕн начальникĕ З.Спиридонова чаплă ентешĕмĕрсен, Иван Охливанкинпа Григорий Петровăн, музыкăна аталантарас тĕлĕшпе тунă пархатарлă ĕçĕсене палăртнă, çамрăк юрăçсене паллă ентешсем пек пулма, ăсталăха куллен аталантарса пыма чĕнсе каланă. Çавăн пекех фестивале килсе çитнĕ хăнасене, республикипе паллă музыка ăсчахĕсене, районти яш-кĕрĕмпе хĕр-упраçа музыкăна явăçтарассишĕн вĕрентсе çул уçса парассишĕн ырми-канми тăрăшнăшăн тав тунă.

Конкурса хутшăннă çамрăк юрăçсем халăх тата эстрада юррисене тăрăшса хăйне евĕрлĕ ăста шăрантарнă. Хăйсене сцена çинче чăн-чăн артистсем пек тытса, илĕртÿллĕ çи-пуçпа, хитре хусканусемпе куракансен кăмăлне тивĕçтернĕ.

8-12 çулхисенчен конкурса 12-ĕн хутшăнма кăмăл тунă. Жюри членĕсем пĕр саслăн пулса чи çамрăк юрăçсенчен Анжела Яруткина (Штанаш) маттур пулнине палăртнă. Вăл тивĕçлипех пĕр­ремĕш вырăна çĕнсе илнĕ, иккĕмĕш вырăнта - Николай Петров (Тури Çĕрпÿкасси), виççĕмĕш - Даша Спиридонова (Хĕрлĕ Чутай).

13-17 çулхисенчен фестивале 13 юрăç хутшăннă. Кунта Александр Аксаков (Кив Атикасси) пултарулăхпа палăрнă, иккĕмĕш вырăнта - Света Шачкова (Питĕркасси), виççĕмĕш - Лиана Шереметьевапа (Хĕрлĕ Чутай) Ирина Кудряшова (Шулю).

Конкурс çĕнтерÿçи ята çамрăк талант Анна Данилова (Хĕрлĕ Чутай) тивĕçнĕ, фестивалĕн Гран-прине çĕнсе илнĕ. Мăн Этменти вăтам шкулта ăс пухакан Эльвира Немешкина ытларах куракансен кăмăлне кайнипе паллă пулса юлнă.

И.Охливанкинпа Г.Петрова халалланă фестиваль çĕнтерÿçисене хаклă парнесем тата диплом парса чысланă.

Жюри членĕсем Чутай тăрăхĕ пултаруллă та ăста юрăçсемпе пуян пулнине асăннă. Çамрăк юрăçсене малашне те ăнăçу, телей суннă, çакăн йышши фестивальсем чăннипех те çамрăк талантсем тупса палăртма май панине палăртса хăварнă.