Самана саккăрла çаптарнă вăхăтра çынсем тĕлĕнмеллипех улшăнчĕç темелле. Халĕ ют çынран кăна мар, тăванран та тем те кĕтме пулать. Хамăр усалланса, чунсăрланса пынăран-ши преступленисен хисепĕ чакма пĕлмест. Пăх та кур: унта çаратнă, кунта - вĕлернĕ тата ытти те. Шалти ĕçсен пайĕ тата право йĕркине сыхлакан органсем ырми-канми ĕçлеççĕ тейĕпĕр. Анчах та лару-тăру çивĕч-ха.

Çакна шута илсех-тăр, районта халăх дружини йĕркеленĕ. Унăн председателĕ пулма райадминистрацин вĕрентÿÿ, çамрăксемпе ĕçлекен, физкультурăпа спорт пайĕн пуçлăхĕн çумне А.Никитина шаннă. Çавăн пек дружинăсене кашни ял администрацийĕсенчех туса хунă, вĕсен командирĕсене те суйланă. Сăмахран, Ачкасси ял администраци территорийĕнче халăхăн ирĕклĕ дружинин командирĕ пулма А.Оринова шаннă. Вăлах çамрăксемпе ĕçлекен специалист та. 20 çын дружина членĕ шутланать. Алексей Владимирович каланă тăрăх, дружинниксем кашни канмалли кунах икшерĕн дежурство тăраççĕ, мероприятисем вăхăтĕнче те хăйсен тивĕçне пурнăçлаççĕ. Сăмах май, хăйсен ирĕкĕпе йĕрке сыхлакансем тăтăшах ĕçĕ-хĕлĕ çинчен отчет тăваççĕ. Хальлĕхе районти пĕтĕм дружинник валли 253 удостоверени хатĕрленĕ, çавăн пекех вĕсем ятарлă çыхăсемпе çÿрĕç.

Нумаях пулмасть дружинăн черетлĕ ларăвĕ иртнĕ. Унта обществăлла е ытти вырăнсенче пулса иртнĕ пăтăрмахсене, йĕркене пăснă тĕслĕхсене пăхса тухнă. Çак ыйтусем тавра ларура дружина председателĕ А.Никитин, райадминистрацин çамрăксемпе ĕçлекен тĕп специалисчĕ С.Князькова, çул çитмен çамрăксемпе ĕçлекен комиссин секретарĕ А.Кучекеева, шалти ĕçсен пайĕн сотрудникĕ А.Михопаров тухса калаçнă, пурте вĕсем йĕрке пăсакансемпе çивĕч кĕрешмеллине палăртнă. Çапла, пурте тачă çыхăнса ĕçлесен çеç обществăра йĕрке тума пулать пулĕ.